استانا. 29 ناۋرىز. سينگاپۋردىڭ ءبىرىنشى پرەمەرى لي كۋان يۋ-دى اقتىق ساپارعا شىعارىپ سالۋعا 1,4 ملن-نان استام ادام جينالدى. بۇل تۋرالى nur.kz حابارلادى.
حابارلامادا كورسەتىلگەندەي, قاراپايىم حالىققا 25-28 ناۋرىز ارالىعىندا لي كۋان يۋ ءمايىتى جاتقان پارلامەنت عيماراتىنا بارۋعا رۇقسات بەرىلگەن. ونىڭ ءمايىتىن كورۋ ءۇشىن كەزەك كۇتۋ كەي كۇندەرى 10 ساعاتقا دەيىن جەتكەن. جەرلەۋدى ۇيىمداستىرۋ كوميتەتىنىڭ Facebook جەلىسىندەگى رەسمي پاراقشاسىنا بۇل كۇندەرى شامامەن 4 ملن. پايدالانۋشى كىرگەن. كوميتەت سايتىنىڭ ءبىر كۇندىك اۋديتورياسى 313 مىڭ ادامعا جەتىپ وتىرعان.
ايتا كەتەيىك, سينگاپۋردىڭ ءبىرىنشى پرەمەرى لي كۋان يۋ 23 ناۋرىزدا جەرگىلىكتى اۋرۋحانالاردىڭ بىرىندە كوز جۇمدى. بۇل جەرگە ول اقپاننىڭ باسىندا وتكىر پنەۆمونيا دياگنوزىمەن تۇسكەن بولاتىن.
جولدىباي بازار.
دەرەك, سۋرەت: nur.kz.