استانا. 29 ناۋرىز. بۇرناعى كۇنى ەۋروپا چەمپيوناتىنىڭ ىرىكتەۋ ءتۋرنيرى اياسىندا ءوتىپ جاتقان چەرنوگوريا – رەسەي ماتچىنىڭ 1-مينۋتىندا تريبۋنادان پەتاردا لاقتىرىپ, قوناقتاردىڭ قاقپاشىسى يگور اكينفەەۆتى جاراقاتتاعان چەرنوگورلىق جانكۇيەردى پوليتسيا قاماۋعا الدى. بۇل تۋرالى «ر-سپورت» حابارلادى.
«چەرنوگوريانىڭ قۇقىق قورعاۋ ورگاندارى رەسەي قۇراماسىنىڭ قاقپاشىسى يگور اكينفەەۆكە فايەر لاقتىردى دەگەن كۇدىك تاڭىلعان چەرنوگوريا قۇراماسىنىڭ جانكۇيەرى لۋكا لازارەۆيچكە قارسى قىلمىستىق ءىس قوزعادى», دەپ حابارلادى cdm.me.
2016 جىلعى ەۋروپا چەمپيوناتىنىڭ ىرىكتەۋ ءتۋرنيرىنىڭ چەرنوگوريا – رەسەي اراسىنداعى كەزدەسۋى جۇما كۇنى تۇندە وتكىزىلدى. ويىن ءبىرىنشى رەت 1-مينۋتتا قاقپاشى اكينفەەۆتىڭ باسىنا تريبۋنادان ۇشقان فايەر كەلىپ تيگەن كەزدە توقتاتىلدى. قاقپاشى زەمبىلمەن اكەتىلىپ, جەرگىلىكتى اۋرۋحاناعا جاتقىزىلدى. ۇزاق ۋاقىتقا سوزىلعان ۇزىلىستەن كەيىن ويىن قايتا جالعاستى. ال قاقپاعا يۋري لودىگين تۇردى.
ەكىنشى تايمدا كەزدەسۋ ءبىرجولا توقتاتىلدى. ەندى دميتري كومباروۆقا تريبۋنادان پىشاق لاقتىرىلدى. بۇدان كەيىن اربيتر ويىندى سوزىپ قاجەتى جوق دەپ شەشتى. دالىرەگى, ۋەفا-نىڭ پرەزيدەنتى ميشەل پلاتيني وسىنداي نۇسقاۋدى ءوزى بەردى.
بۇدان بۇرىن لازارەۆيچتىڭ قاراۋ كامەراسى انىقتالعانى ايتىلدى. بۇل جانكۇيەر ءوزىن وتە ەلىرىپ ۇستاعانىمەن دە كوزگە ءتۇستى. تاعى ەكى ادام قوعامدىق ءتارتىپتى بۇزعانى ءۇشىن قاماۋعا الىندى.
سول كۇنى تۇندە رەسەي قۇراماسى ماسكەۋگە ورالدى. جاراقات العان اكينفەەۆ تە كوماندامەن بىرگە ەلىنە كەلدى.
مۇرات ايتقوجا.
https://youtu.be/fJ4_kLybBug