دەنيس تەن – الەم چەمپيوناتىنىڭ قولا جۇلدەگەرى!

استانا. 28 ناۋرىز. قىتايدىڭ شانحاي قالاسىندا وتكەن مانەرلەپ سىرعاناۋدان الەم چەمپيوناتىندا وتانداسىمىز دەنيس تەن قولا جۇلدەمەن شەكتەلۋگە ءماجبۇر بولدى. بۇل تۋرالى egemen.kz حابارلادى. بۇگىن وتكەن ەركىن باعدارلاما سايىسىندا سپورتشىمىز وتە جوعارى دەڭگەيدە ونەر كورسەتتى. سونىڭ ناتيجەسىندە, 181,83 ۇپاي ولجالاپ, كىشى التىن مەدالدى يەمدەندى. كىشى كۇمىس جۇلدە يسپان سپورتشىسى حاۆەر ەرناندەسكە بۇيىردى. ول بۇل سايىستا 181,16 ۇپاي جينادى. ال جاپونيا سەنىم ارتقان يۋدزۋرۋ حانيۋ ەركىن باعدارلامادا باستى ەكى باسەكەلەسىنەن ايتارلىقتاي قالىپ قويدى. بۇل جولى ونىڭ ونەرىن تورەشىلەر 175,88 ۇپايمەن باعالادى. قوس جارىس كۇنىنىڭ قورىتىندىسى بويىنشا حاۆەر ەرناندەس (273,90 ۇپاي) الەم چەمپيونى اتانسا, يۋدزۋرۋ حانيۋ (271,08 ۇپاي) كۇمىس جۇلدەنى قانجىعاسىنا بايلادى. ال جالپى ەسەپتە 267,72 ۇپاي جيعان دەنيس تەن الەم چەمپيوناتىنىڭ قولا جۇلدەسىن ولجالادى. جاسىراتىنى جوق, بۇل دودادا دەنيستەن تەك التىن مەدال كۇتتىك. سەبەبى, ول چەمپيون اتانۋعا ابدەن لايىق ەدى. دەگەنمەن, كەشە وتكەن قىسقا باعدارلاما سايىسىندا ۇيىمداستىرۋشىلار ورەسكەل قاتەلىككە بوي الدىرىپ, ءبىزدىڭ سپورتشىنىڭ ونەرىنە كەرى اسەرىن تيگىزدى. ناقتى ايتار بولساق, دەنيس ايدىنعا شىققان كەزدە ۇيىمداستىرۋشىلار ونىڭ اۋەنىن دۇرىس قويماي, سونىڭ سالدارىنان سپورتشىمىزدىڭ جۇيكەسىنە ايتارلىقتاي سالماق ءتۇسىردى. ايتا كەتەيىك, وتانداسىمىز ءۇشىن بۇل – الەم چەمپيوناتىنىڭ ەكىنشى مەدالى. وسىعان دەيىن تەننىڭ 2013 جىلى كانادادا وتكەن الەم چەمپيوناتىندا كۇمىس جۇلدەگەر اتانعانى ەسىمىزدە. سونداي-اق, دەنيستىڭ ەنشىسىندە وليمپيادانىڭ (سوچي, 2014 ج.) قولا جۇلدەسى مەن قىسقى ازيا ويىندارىنىڭ (استانا, 2011 ج.) التىن مەدالى بار. ودان بولەك, وسىدان ءبىر جارىم اي بۇرىن وڭتۇستىك كورەيادا وتكەن ءتورت قۇرلىق تۋرنيرىندە چەمپيون اتانعان بولاتىن. بيىلعى الەمدىك دودانىڭ قىزدار اراسىنداعى باسەكەسىندە رەسەي سپورتشىسى ەليزاۆەتا تۋكتامىشەۆاعا تەڭ كەلەر قارسىلاس تابىلمادى. جالپى ەسەپتە 210,36 ۇپاي جيناعان ول الەم چەمپيونى اتاندى. كۇمىس جۇلدە ساتوكو مياحاراعا (جاپونيا, 193,60 ۇپاي) بۇيىرسا, قولا مەدال تۋكتامىشەۆانىڭ وتانداسى ەلەنا راديونوۆانىڭ (191,47 ۇپاي) ەنشىسىنە جازىلدى. ەلامان قوڭىر. دەرەك: egemen.kz. سۋرەت: «قازاقستان» ۇلتتىق تەلەارناسى.