استانا. 28 ناۋرىز. كەشە تۇندە فۋتبولدان 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا 9 ويىن ءوتتى. سونىڭ ىشىندە بەس كوماندا ءىرى ەسەپپەن جەڭىسكە جەتتى. تاعى ءۇش ماتچتا جەڭىمپازدار انىقتالدى. ال چەرنوگوريا مەن رەسەي اراسىنداعى ويىن 68-مينۋتتا توقتاتىلىپ, اياقسىز قالدى. بۇل تۋرالى egemen.kz حابارلادى.
الدىمەن العاشقى سەگىز ويىننىڭ ناتيجەسىنە توقتالايىق:
انگليا – ليتۆا 4:0
گولدار: ۋەين رۋني 6, دەنني ۋەلبەك 45, راحيم ستەرلينگ 58, گارري كەين 73.
يسپانيا – ۋكراينا 1:0
گول: الۆارو موراتا 28.
ليحتەنشتەين – اۆستريا 0:5
گولدار: مارتين حارنيك 14, مارك يانكو 16, داۆيد الابا 58, زلاتكو يۋنۋزوۆيچ 74, ماركو ارناۋتوۆيچ 90+3.
ماكەدونيا – بەلارۋس 1:2
گولدار: الەكساندر ترايكوۆسكي 9 – تيموفەي كالاچەۆ 44, سەرگەي كورنيلەنكو 82.
مولدوۆا – شۆەتسيا 0:2
گولدار: زلاتان يبراگيموۆيچ 46, 84 (پەنالتي).
سلوۆاكيا – ليۋكسەمبۋرگ 3:0
گولدار: ادام نەمەتس 10, ۆلاديمير ۆايسس 21, پەتەر پەكاريك 40.
سلوۆەنيا – سان-مارينو 6:0
گولدار: يوسيپ يليچيچ 10, كەۆين كامپل 49, اندراج سترۋنا 50, ميليۆوە نوۆاكوۆيچ 52, دەيان لازارەۆيچ 73, برانكو يليچ 88.
شۆەيتساريا – ەستونيا 3:0
گولدار: فابيان شەر 17, گرانيت دجاكا 27, حاريس سەفەروۆيچ 80.
چەرنوگوريا – رەسەي 0:0 (66-مينۋتتا توقتاتىلدى)
ەندى جانكۇيەرلەردىڭ نازارىن اۋدارعان چەرنوگورياداعى ويىنعا نازار اۋدارايىق. كەزدەسۋ پودگوريتسا قالاسىندا ءوتتى. ادەتتەگىدەي ماتچ الدىنداعى بارلىق رەسمي شارالاردان كەيىن تورەشى ىسقىرىق شالدى. دوپتى ويىنعا الاڭ يەلەرى قوستى. ءتورت-بەس فۋتبولشى دوپقا اياق تيگىزىپ ۇلگەرمەستەن كەزدەسۋ توقتاتىلدى. بۇل كەزدە ويىننىڭ بار بولعانى 10-سەكۋندى ءجۇرىپ جاتقان ەدى. ماتچتىڭ توقتاتىلۋ سەبەبى, چەرنوگوريا جانكۇيەرلەرىنىڭ ءبىرى رەسەي قاقپاشىسى يگور اكينفەەۆكە پەروتەحنيكالىق قۇرال لاقتىرىپ, ويىنشىنى اۋىر جاراقاتتادى. وتى لاۋلاعان پەتاردا قاقپاشىنىڭ ءدال جەلكە تۇسىنا ءتيىپ, شاشىنىڭ بەلگىلى ءبىر بولىگىن كۇيىك شالدى. سونداي-اق, اكينفەەۆتىڭ بايقاۋسىزدا بولعان قاتتى سوققىدان ميى شايقالعان. ناتيجەسىندە, دارىگەرلەر ويىنشىنى ارنايى كولىكپەن الىپ كەتتى. بىردەن جەرگىلىكتى اۋرۋحاناعا جەتكىزىلگەن رەسەي قاقپاشىسى تۇندە كومانداسىمەن بىرگە ماسكەۋگە ۇشىپ كەلدى.
وسى جايتتان كەيىن كوپشىلىك ويىن توقتاتىلىپ, چەرنوگورياعا تەحنيكالىق جەڭىلىس بەرىلەدى دەپ توپشىلادى. الايدا, ارادا 35 مينۋت ۋاقىت وتكەندە ماتچ قايتا جالعاستى. كەيىن مۇنداي شەشىمدى ۋەفا پرەزيدەنتى ميشەل پلاتيني قابىلداعانى بەلگىلى بولدى.
نەگىزگى قاقپاشىسىنان ايىرىلعان رەسەي العاشقى مينۋتتان باستاپ ويىنشى الماستىردى. اكينفەەۆتىڭ ورنىنا يۋري لودىگين شىقتى.
ۇزىلىسكە دەيىن ەسەپ اشىلعان جوق. ەكىنشى كەزەڭ 15 مينۋتقا كەشىگىپ باستالدى. ۋاقىت وتكەن سايىن جانكۇيەرلەر اراسىندا ءتارتىپ بۇزۋشىلىقتار كوبەيىپ, ستاديوننىڭ ءار جەرىنەن ءتۇتىنى بۋداقتاعان وتشاشۋلار ءجيى اتىلا باستادى. كەزدەسۋدىڭ 65-مينۋتىندا چەرنوگوريا ويىنشىلارى ءوز ايىپ الاڭىندا الەكساندر كوكوريندى شالىپ جىعىپ, گەرمانيادان كەلگەن باس قازى دەنيز ايتەكين بىردەن 11 مەترلىك نۇكتەنى كورسەتتى. بۇل رەسەي ويىنشىلارىنا ەسەپ اشاتىن تاماشا مۇمكىندىك ەدى. دەسەك تە, پەنالتيدى ورىنداعان رومان شيروكوۆ قاقپاشى ۆۋكاشين پولەكسيچتەن ايلاسىن اسىرا المادى. وسى ساتتە ستاديوندى باسقان ءتۇتىن قالىڭداپ, جانكۇيەرلەر اراسىنداعى قاقتىعىس ءتىپتى كۇشەيىپ كەتتى. ناتيجەسىندە, ويىن ەكىنشى مارتە توقتاتىلدى. بىراق, بۇل جولى قايتا جالعاسپادى. قازىر ۋەفا-نىڭ تارتىپتىك كەڭەسى وسى ماسەلە بويىنشا جۇمىس جۇرگىزۋدە. الەۋمەتتىك جەلىلەردە قىزۋ تالقىعا تۇسكەن بۇل جايت فۋتبولسۇيەر قاۋىمنىڭ باستى نازارىندا تۇرعانى انىق.
وسى رەتتە مۇنداي جايسىز وقيعالاردىڭ سوڭعى كەزدەرى جيىلەپ كەتكەنىن ايتا كەتەيىك. ماسەلەن, چەمپيوندار ليگاسىنىڭ 2004-2005 جىلعى ماۋسىمىندا شيرەك فينالدا «ميلان» مەن «ينتەر» وينادى. سول كەزدە «ميلاننىڭ» قاقپاشىسى ديدا دا ءدال وسىنداي جاعدايعا تاپ بولدى. ناتيجەسىندە, تورەشى ويىندى سول جەردەن توقتاتىپ, «ينتەر» كومانداسىنا تەحنيكالىق جەڭىلىس جازىلدى.
سونداي-اق, 2012 جىلدىڭ 7 قىركۇيەگىندە پولشا قۇراماسىنىڭ قاقپاشىسى پشەمىسلاۆ تىتون دا پەروتەحنيكالىق قۇرالدان زارداپ شەكتى. 2014 جىلعى الەم چەمپيوناتىنا ىرىكتەۋ تۋرنيرىندە پولشا سول كەزدە ءدال وسى چەرنوگوريامەن ويناپ جاتقان ەدى. ءوز قاقپالارىنا گول جىبەرىپ العانىن كوتەرە الماعان چەرنوگوريالىق جانكۇيەرلەر الاڭعا پەروتەحنيكالىق قۇرالداردى لاقتىرا باستادى. سولاردىڭ ءبىرى تىتوننىڭ ءدال قاسىنا ءتۇسىپ, جارىلدى. سالدارىنان, قاقپاشىنىڭ ەستۋ قابىلەتىنە زاقىم كەلدى.
چەرنوگوريا جانكۇيەرلەرى قاقپاشىنى نىساناعا الۋلارىن مۇنىمەن توقتاتقان جوق. 2013 جىلدىڭ 27 ناۋرىزىندا اتالعان كوماندا انگلياعا قارسى الاڭعا شىقتى. سول كەزدە اعىلشىنداردىڭ قاقپاشىسى دجو حارتقا جانكۇيەرلەر قولدارىنا تۇسكەندەرىن لاقتىرىپ, ويىنىنا كەدەرگى كەلتىردى. سوڭىندا اجەتحانا قاعازىنا دەيىن لاقتىرىپ, شەكتەن شىقتى.
بۇگىندە فيفا مەن ۋەفا وسىنداي ماسەلەلەردى ءجىتى زەرتتەپ, قولدانىلاتىن جازانى كۇشەيتۋ كەرەكتىگىن ءجيى ايتىپ ءجۇر. ءتىپتى جانكۇيەرلەرىنىڭ باسبۇزارلىعى ءۇشىن كوماندانى بارلىق جارىستان شەتتەتۋ مۇمكىندىگى دە قاپەرگە الىندى. مۇنداي قادامعا امالسىزدان باراتىنىن ايتقان رەسمي وكىلدەر قازىر جانكۇيەر ماسەلەسى ەڭ وزەكتى ەكەنىن جەتكىزدى.
ايتا كەتەيىك, بۇگىن 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا تاعى 9 ويىن وتەدى. سونىڭ ءبىرى – قازاقستان مەن يسلانديا اراسىنداعى ماتچ. «استانا-ارەنا» ستاديونىند وتەتىن ويىن ساعات 21:00-دە باستالادى.
ەلامان قوڭىر.
دەرەك: egemen.kz.
سۋرەت: sports.ru.