استانا. 28 ناۋرىز. رەسەي فەدەراتسياسىنىڭ بيلىگى كەمەروۆو وبلىسىنىڭ گۋبەرناتورى امان تولەەۆكە ورنىنا لايىقتى ءىزباسار قالدىرىپ, وتستاۆكاعا كەتۋدى ۇسىنىپ وتىر. بۇل تۋرالى ربك حابارلادى.
«كرەمل امان تولەەۆكە كۋزباستىڭ گۋبەرناتورلىعى قىزمەتىنەن كەتۋى كەرەك ەكەنىن بىرنەشە رەت ەسكەرتىپ ۇلگەردى. ال تولەەۆتىڭ ءوزى بولسا, مەرەيتويلىق مەرزىمگە جەتىپ بارىپ, كەتكەندى قالايدى», - دەپ اتاپ ءوتتى اگەنتتىك.
كرەمل تاراپىنان ەستىلىپ جاتقان بۇل ۇسىنىستىڭ باسى وتكەن جىلدىڭ شىلدە ايىنان سورە تارتادى. رەسەي بيلىگى بۇل ۇسىنىسقا بيىلعى جىلدىڭ باسىندا تاعى قايتىپ ورالدى. ول سودان بەرگى ارالىقتا امان عۇمار ۇلىنىڭ ماسەلەنى وڭتايلى شەشۋى كەرەكتىگىن قايتا-قايتا ەسكەرتۋمەن كەلەدى. بۇل, بىرىنشىدەن, گۋبەرناتوردىڭ جاسى ۇلعايىپ, دەنساۋلىعى سىر بەرە باستاۋىمەن بايلانىستى, ەكىنشىدەن, «وبلىستىڭ دامۋىن جاڭا ەكونوميكالىق مودەلگە كوشىرۋدىڭ» قاجەتتىگىنەن تۋىنداپ وتىر. «قازىرگى ەكونوميكالىق جاعدايدا كوتەرىڭكى سوتسياليستىك مىندەتتەمە قابىلداۋ تارتىبىمەن جۇمىس جاسايتىن «كەمەروۆو ءسوتسياليزمى» ومىرشەڭ ەمەس», - دەپ اتاپ ءوتتى كرەملگە جاقىن مانبە وسى ورايدا.
ونىڭ ايتۋىنشا, ۇكىمەت ازىرگە بيلىكتىڭ رەيتينگىسى جوعارى دەڭگەيدەن كورىنىپ, ەكونوميكالىق داعدارىس ءوزىنىڭ شارىقتاۋ شەگىنە جەتپەي تۇرعان كەزدە ايماققا «جاس لەپ» كەلۋدىڭ ماڭىزى ايرىقشا زور بولماق.
كەمەروۆو وبلىستىق اكىمشىلىگىنىڭ ءباسپاسوز قىزمەتى بۇل جاعدايعا بايلانىستى تۇسىىندىرمە بەرۋدەن باس تارتقان. ول: «وبلىس اكىمشىلىگى رەسمي حابارلاما كۇتىپ وتىر» دەگەننەن ارىعا بارماعان. ال الداعى ءساۋىر ايىندا امان تولەەۆتىڭ گۋبەرناتورلىعىنىڭ ءتورتىنشى مەرزىمى اياقتالادى.
مۇرات ايتقوجا.
مانبە, سۋرەت: ربك.