استانا. 29 ماۋسىم. قىزىلوردا قالاسىندا ۇلى جەڭىستىڭ 70 جىلدىعىنا ارنالعان قازاقستان رەسپۋبليكاسىنىڭ گاندبولدان ايەلدەر اراسىنداعى جازعى سپارتاكياداسى ءوتتى. وندا قىزىلوردانىڭ گاندبولشىلارى توپ جارىپ, 3 دۇركىن جەڭىمپاز اتاندى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى حابارلادى.
سپارتاكياداعا الماتى, الماتى, اقتوبە, وڭتۇستىك قازاقستان, شىعىس قازاقستان, پاۆلودار جانە قىزىلوردا وبلىستارىنان 117 سپورتشى قاتىستى.
جارىس قورىتىندىسى بويىنشا قىزىلوردا وبلىسىنىڭ "سەيحۇن-كام-قمۋ" كومانداسى قاتارىنان ءۇش مارتە ەل سپارتاكياداسىنىڭ چەمپيونى اتاندى.
ايتا كەتەيىك, ءتورت جىلدا ءبىر مارتە ۇيىمداستىرىلاتىن بايراقتى دودادا سىر سپورتشىلارى 2007 جانە 2011 جىلدارى 2 مارتە قازاقستان سپارتاكياداسىنىڭ چەمپيونى اتاعىنا قول جەتكىزگەن بولاتىن.
فينالدا قىزىلوردالىق قىزدار الماتى وبلىسىنىڭ كومانداسىمەن كەزدەسىپ, 37:29 ەسەبىمەن جەڭىسكە جەتتى. جۇلدەلى ءۇشىنشى ورىندى شىعىس قازاقستان وبلىسىنىڭ كومانداسى ەنشىلەدى.
جۇلدەلى ورىن العان كوماندالار مادەنيەت جانە سپورت مينيسترلىگىنىڭ كۋبوك, مەدال جانە ديپلومدارىمەن ماراپاتتالدى.
تالعات رايىمبەك.
دەرەك, سۋرەت: قىزىلوردا وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى.