شىمكەنتتىك «ورداباسى» فۋتبول كلۋبىنىڭ پرەزيدەنتى دارحان قىزايباەۆ كوماندانىڭ رەسمي اتاۋىن وزگەرتۋ جانە اۋقىمدى رەبرەندينگ جۇرگىزۋ جوسپارى تۋرالى مالىمدەدى. كلۋب باسشىلىعى بۇل قادام كوماندانىڭ ەۋروپالىق ارەناداعى تانىمالدىلىعىن ارتتىرۋ ءۇشىن جاسالىپ جاتقانىن العا تارتتى, دەپ حابارلايدى Egemen.kz.
ء«بىز كلۋبتىڭ اتاۋىن وزگەرتۋدى جوسپارلاپ وتىرمىز. جاڭا ەسىمنىڭ «FC Orda Shymkent» بولعانىن قالايمىز. ءبىزدىڭ باستى ماقساتىمىز – بولاشاقتا ەۋروپادا تۇراقتى تۇردە ونەر كورسەتۋ. سوندىقتان «ورداباسى» دەپ سوزىپ ايتقاننان گورى, قىسقا ءارى نۇسقا «وردا» دەۋ دۇرىسىراق بولادى. بۇل اتاۋ شەتەلدىكتەر مەن ەۋروپالىقتار ءۇشىن قابىلداۋعا الدەقايدا جەڭىل بولادى. الايدا كلۋبتىڭ ماعىناسى, فيلوسوفياسى مەن تاريحى ەش وزگەرىسسىز قالادى. ارينە, بۇعان قوسا ويىن فورماسى مەن لوگوتيپ تە جاڭارادى. اعىمداعى ماۋسىمدا ءبارىن دايىنداپ, جانكۇيەرلەرىمىزگە تانىستىرامىز. بارلىق وزگەرىستەر رەسمي تۇردە كەلەسى ماۋسىمنان باستاپ كۇشىنە ەنەدى دەپ جوسپارلانىپ وتىر», دەدى ول.
«ورداباسى» وردا بۇزدى
اتاۋىن وزگەرتۋگە دايىندالىپ جاتقان شىمكەنت ۇجىمى قازىرگى ۋاقىتتا ىشكى بىرىنشىلىكتە دە كوش باستاپ تۇر. قازىر «ورداباسى» قازاقستان پرەمەر-ليگاسىنىڭ (قپل) تۋرنيرلىك كەستەسىندە 12 تۋردىڭ قورىتىندىسى بويىنشا 28 ۇپاي جيناپ, سەنىمدى تۇردە ءبىرىنشى ورىندا كەلەدى.