اقسۋات اۋدانىندا ۇلتتىق سپورتتى, ونەردى, ءبىلىم مەن رۋحانياتتى ءبىر ارناعا توعىستىرعان «اسىل بەسىك – اقسۋات» اۋقىمدى فەستيۆالى ءوتىپ جاتىر. سالتاناتتى شاراعا ەلىمىزدىڭ تۇكپىر-تۇكپىرىنەن اعىلعان سپورتشىلار, ونەرپازدار مەن مارتەبەلى قوناقتار جينالدى, دەپ حابارلايدى Egemen.kz.
ءدۇبىرلى جيىننىڭ اشىلۋ راسىمىندە ايماق باسشىسى بەرىك ءۋالي ارنايى قۇتتىقتاۋ ءسوز سويلەپ, بۇل شارانىڭ ەل ومىرىندەگى ماڭىزىنا ەرەكشە توقتالىپ ءوتتى.
«قويناۋى قۇتقا تولعان, باۋرايى جۇرتقا تولعان تارباعاتايدىڭ ەڭىسىن جايلاعان اقسۋات جەرى – حالقىمىزدىڭ تاريحى مەن تاعدىرىندا ايرىقشا ورنى بار قاسيەتتى مەكەن. ەلدىڭ ءسوزىن سويلەپ, ۇلت رۋحانياتىن بايىتقان, تۇگىن تارتسا ماي شىعىپ, تاسىن تۇرتسە تاريح سويلەيتىن بۇل ءوڭىر تالاي تاۋ تۇلعانى دۇنيەگە اكەلگەن تاعىلىمدى ولكە. سوندىقتان بۇگىنگى باس قوسۋدىڭ ءدال وسى قاسيەتتى توپىراقتا ءوتۋىنىڭ وزىندىك ءمانى بار. مەملەكەت باسشىسى قاسىم-جومارت كەمەل ۇلى توقاەۆ: ء«بىز وتانشىل جانە مەملەكەتشىل بولۋىمىز كەرەك. شىن مانىندە, تۋعان جەرىڭدى سۇيۋدەن اسقان باقىت جوق. جۇرەگى وتانىم, ەلىم, جەرىم دەپ سوققان ادام ەشتەڭەدەن قايمىقپايدى», – دەپ اتاپ وتكەن بولاتىن. وسىنداي ەلىن سۇيگەن, ەلى سۇيگەن ازاماتتار ءبىزدىڭ ورتامىزدان تابىلىپ وتىر. ءداستۇرلى تۇردە وتكىزىلىپ كەلە جاتقان ءدۇبىرلى تويدىڭ شاشباۋىن كوتەرگەن اتىمتاي جومارت جاندارعا, جەرلەسىمىز دۋلات تاستەكەەۆكە جانە قايىرلى حاسەنوۆكە بارشا اۋدان, وبلىس جۇرتشىلىعى اتىنان العىسىمدى بىلدىرەمىن! بيىل بۇل فەستيۆالدىڭ ماڭىزى بۇرىنعىدان دا ارتا ءتۇستى. ويتكەنى, «اسىل بەسىك – اقسۋات» فەستيۆالى رەسپۋبليكالىق دەڭگەيدە وتكىزىلەتىن مادەني-كوپشىلىك ءىس-شارالار تىزبەسىنە ەنگىزىلىپ, كەڭ كولەمدە اتالىپ وتۋدە. بۇل – اقسۋات ءوڭىرىنىڭ تاريحي-رۋحاني الەۋەتىنە بەرىلگەن جوعارى باعا. فەستيۆال باعدارلاماسىنىڭ ءوز باستاۋىن حالقىمىزدىڭ ارداقتى پەرزەنتى, ەلدىك پەن ەرلىكتىڭ سيمۆولىنا اينالعان ىرعىزباي اتا كەسەنەسىنەن الۋى – وتكەنگە تاعزىم مەن رۋحاني ساباقتاستىقتىڭ ايقىن بەلگىسى. وسىمەن توعىزىنشى رەت ۇيىمداستىرىلىپ جاتقان فەستيۆال ۇلتتىق سپورت پەن سپورت پەن ونەردى, ءبىلىم مەن مادەنيەتتى ءبىر ارناعا توعىستىرىپ وتىر», دەدى ايماق باسشىسى.
ءىس-شارا بارىسىندا ۇيىمداستىرۋشىلار كوپ بالالى اناعا پاتەر كىلتىن تاپسىردى. سونداي-اق, «تارباعاتاي تارلانى», «اسىل انا», «اسىل تاس» مەدالدارى, ەكى ستۋدەنتكە گرانت بەرىلدى.
ۇلىتاۋدا رەسپۋبليكالىق ەتنومادەني فەستيۆال وتەدى
بيىلعى فەستيۆال اياسىندا العاش رەت رەسپۋبليكالىق دەڭگەيدەگى توعىزقۇمالاق ءتۋرنيرى جالاۋىن جەلبىرەتتى. سونداي-اق, قازاق كۇرەسىنەن ASSYL ARLAN ءتۋرنيرى, ASSYL TULPAR بايگە جارىستارى, اۋدارىسپاق سايىسى جانە «ارتىق ءبىلىم – كىتاپتا» وبلىستىق زياتكەرلىك بايقاۋى ۇيىمداستىرىلىپ جاتىر.
ASSYL ARLAN تۋرنيرىندە وگىز پالۋان مەن تۇيە پالۋان انىقتالسا, ASSYL TULPAR اياسىندا 25 شاقىرىمدىق الامان بايگە, 15 شاقىرىمدىق توپ بايگە جانە 20 شاقىرىمدىق «اقسۋات ارعىماعى» جارىسى وتەدى.
ءۇش كۇن بويى ۇزىلمەيتىن فەستيۆال شىمىلدىعى ىرعىزباي اتا كەسەنەسىندەگى تاعزىم شارالارىمەن اشىلدى. بۇدان بولەك, باعدارلامادا ۇلتتىق سپورت باسەكەلەرى, ءتۇرلى مادەني-كوپشىلىك شارالار مەن تەاترلاندىرىلعان قويىلىمدار قاراستىرىلعان. مەرەكەلىك كەش اياسىندا ASSYLTAS تەاترىنىڭ «اۋىل كەشى كوڭىلدى» اتتى مۋزىكالىق تۋىندىسى ساحنالىپ, شارا ءزاۋلىم گالا-كونتسەرتكە ۇلاسادى.