استانادا ءماجىلىس سپيكەرى, «AMANAT» پارتياسىنىڭ توراعاسى ەرلان قوشانوۆتىڭ توراعالىعىمەن پارتياسى ساياسي كەڭەسىنىڭوتىرىسى ءوتتى. ونىڭ قورىتىندىسى بويىنشا مەملەكەتتەگى بارلىق پروگرەسسيۆتى قوعامدىق-ساياسي كۇشتەردى ادىلەتتى جانە پروگرەسسيۆتى قازاقستاندى قۇرۋ جولىندا كۇش بىرىكتىرىپ, جۇمىلا جۇمىس ىستەۋگە شاقىرعان مالىمدەمە قابىلداندى. وتىرىسقا ساياسي كەڭەس پەن پارتيا بيۋروسىنىڭ مۇشەلەرى, ورتالىق اپپاراتتىڭ باسشىلىعى, وڭىرلىك فيليالداردىڭ توراعالارى مەن اتقارۋشى حاتشىلارى قاتىستى, دەپ حابارلايدى Egemen.kz.
ءوز سوزىندە ەرلان قوشانوۆ جۋىردا مەملەكەت باسشىسى مەملەكەتتىك تۋ كوتەرۋ راسىمىندە ەلدامۋىنىڭ جاڭا باعىتىن ايقىنداپ, بارلىق سالاۋاتتى ءارى پروگرەسسيۆتى قوعامدىق-ساياسي كۇشتەردى جالپىۇلتتىق قۇندىلىقتار مەن ماقساتتار توڭىرەگىنە توپتاسۋعا شاقىرعانىن اتاپ ءوتتى. وسىعان بايلانىستى, «AMANAT» جاۋاپتى ساياسي پارتيا رەتىندە مەملەكەت باسشىسىنىڭ ۇندەۋىن تولىق قولدايدى جانە ەلدى دامىتۋعا باعىتتالعان اۋقىمدى پرەزيدەنتتىك كۇن ءتارتىبىن جۇزەگە اسىرۋ جولىندا ەڭبەك ەتۋگە دايىن بارلىق كۇشتەرمەن ءوز الەۋەتىن بىرىكتىرۋگە دايىن.
«بۇگىن ءبىز وسى تاريحي كەزەڭنىڭ ماڭىزىن تەرەڭ ءتۇسىنۋىمىز كەرەك. جاڭا كونستيتۋتسيانىڭ قابىلدانۋىمەن تاۋەلسىز قازاقستاننىڭ جاڭا ءداۋىرى باستالدى. ەشقانداي اسىرا سىلتەۋسىز ايتار بولساق, بۇل – حالقىمىز قولداعان پرەزيدەنتىمىزدىڭ اسا ءىرى جەتىستىگى ءارى ساياسي جەڭىسى. ەندى ءبىزدىڭ الدىمىزدا جاڭا كونستيتۋتسيادا بەلگىلەنگەن بارلىق ماقساتتى جۇزەگە اسىرۋ مىندەتى تۇر. بۇل – جالعىز اتقارۋعا كەلمەيتىن كۇردەلى جۇمىس. ول بىزدەن جۇدىرىقتاي جۇمىلۋدى, بىرلىك پەن كەلىسىمدى تالاپ ەتەدى. بۇگىن ءبىز قوعامعا جاۋاپكەرشىلىك پەن ۇيىمشىلدىقتىڭ ۇلگىسىن كورسەتۋىمىز قاجەت», دەدى ەرلان قوشانوۆ.
وتىرىس بارىسىندا ءماجىلىس دەپۋتاتى سنەجاننا يماشەۆا جاڭا كونستيتۋتسيا كۇشىنە ەنۋىنىڭ تاريحي ماڭىزىن اتاپ ءوتىپ, قوعامدىق-ساياسي كۇشتەردى مەملەكەتتى دامىتۋدىڭ ستراتەگيالىق مىندەتتەرى توڭىرەگىندە توپتاسۋعا شاقىردى. الماتى وبلىستىق فيليالىنىڭ توراعاسى قۋات بايعودجاەۆپرەزيدەنت باستاماشى بولعان رەفورمالار وڭىرلەردىڭ سەرپىندى دامۋىنا ىقپال ەتىپ, جۇرگىزىلىپ جاتقان وزگەرىستەرگە دەگەن ازاماتتار سەنىمىن نىعايتىپ وتىرعانىن ايتتى. ماڭعىستاۋ وبلىستىق فيليالىنىڭ جەتەكشىسى نۇربەك قاراساەۆ مەملەكەتتىڭ اۋقىمدى قوعامدىق-ساياسي جاڭعىرۋى جاعدايىندا قوعامدىق كەلىسىم مەن بىرلىكتى ساقتاۋدىڭ ماڭىزىنا نازار اۋداردى. ءماجىلىس دەپۋتاتى ەرلان سايروۆ اتا زاڭنىڭ كۇشىنە ەنۋى جاڭا ساياسي كەزەڭدى اشاتىنىن ايتىپ, ەل تاۋەلسىزدىگىن نىعايتۋ جولىندا كۇش-جىگەردى بىرىكتىرۋگە شاقىردى.