كەشە ەل پرەزيدەنتتىگىنە كانديدات تۇرعىن سىزدىقوۆ سايلاۋالدى ناۋقاننىڭ اياسىندا كوكشەتاۋ قالاسىندا بىرقاتار كەزدەسۋلەر وتكىزدى. ەڭ ءبىرىنشى كەزەكتە كانديدات «كوكشە» اكادەمياسىنىڭ ستۋدەنتتەرىمەن كەزدەستى. كەزدەسۋدىڭ مودەراتورى قكحپ اقمولا وبلىستىق كوميتەتىنىڭ ءبىرىنشى حاتشىسى بەيسەنباي ءماجيتوۆ بولدى.
ت.سىزدىقوۆ ءوز سوزىندە باتىس مادەنيەتى ءبىزدىڭ جاستارعا تەرىس ىقپال ەتىپ وتىرعانىن ايتتى. «گولليۆۋد فيلمدەرى مەن باتىستىڭ كومپيۋتەرلىك ويىندارىندا قاتىگەزدىك كورىنىستەر ءجيى ورىن الادى. باتىس مادەنيەتى بۇگىندە زورلىق-زومبىلىققا تولى. ولار ءوزىن ءوزى جەتىلدىرىپ, دامىتقىسى كەلمەيدى. باتىستىڭ تاماقتانۋ جۇيەسى, فاست-فۋد پەن ءتۇرلى گەنەتيكالىق وزگەرىسكە ۇشىراعان ونىمدەردى پايدالانۋ دەنساۋلىققا قاۋىپ توندىرەدى. مۇنىڭ ءبارى از شىعىندالىپ, وزدەرىنە مول تابىس اكەلۋ ماقساتىن كوزدەپ وتىر. ال زياندى تاماقتاردى پايدالانۋ الۋان ءتۇرلى اۋرۋلارعا اكەلەدى», دەدى پرەزيدەنتتىككە كانديدات.
كەلەسى كەزەكتە ت.سىزدىقوۆ باتىس ەلدەرى دۇرىس تاماقتانباي, سالاماتتى ءومىر سالتىن ۇستانباعاننىڭ سالدارىنان سەمىرۋ جانە كوپتەگەن اۋرۋلار بويىنشا الەم ەلدەرى اراسىندا كوش باستاپ تۇرعانىن اتاپ كورسەتتى.
كەيىن كانديدات ت.سىزدىقوۆ «كوكشەتاۋمينۆودى» جشس كاسىپورنىنىڭ جۇمىسشىلارىمەن كەزدەستى. بۇل شارانى قكحپ اقمولا وبلىستىق كوميتەتىنىڭ ءبىرىنشى حاتشىسى بەيسەنباي ءماجيتوۆ اشتى. مۇنداعى كەزدەسۋدە دە پرەزيدەنتتىككە كانديدات ءسوزىن تومەندەگىشە ساباقتادى:
«بارلىق كومپيۋتەرلىك ويىنداردا ەرەكشە ۆيرۋستار بار. ولار بالالاردىڭ ساناسىنا تەرەڭ ءسىڭىپ, جاستاردى باسقىنشىلىققا يتەرمەلەيدى. ءبىز باتىس مادەنيەتىنىڭ ىقپالىن شەكتەۋىمىز كەرەك. شەتەلدەر وزبىرلىقتى جاپپاي ناسيحاتتاپ جاتىر. بۇل ادامدى اقىل-ەسىنەن, ادامگەرشىلىگىنەن ايىرىپ, ادام ءومىرىن قۇنسىزداندىرادى».
ءسوزىنىڭ سوڭىندا ت.سىزدىقوۆ بىلاي دەدى:
– شەتەلدىڭ كيىمى, مۋزىكاسى, فيلمدەرى مەن سەريالدارى جاستاردىڭ سانا-سەزىمىن بۇزادى. باتىستىڭ ءومىر ستاندارتتارى ونداعى تۋ ءوسىمىنىڭ تومەندەۋىنە اكەلدى. ول جاقتىڭ جاستارى وزىنە جۇكتەلگەن مىندەتتەردى ورىنداعىسى جوق. ءتىپتى, باتىس ەلدەرىنىڭ مۋلتفيلمدەرىندەگى كەيىپكەرلەر ءبىر-ءبىرىن بالاعاتتاپ, ءولتىرىپ جۇرگەن جاندار. وسىنداي باتىستىڭ ونىمدەرى بالالاردى زورلىق-زومبىلىققا «تاربيەلەيدى». گولليۆۋد ستاندارتتارى جاڭا كيىم-كەشەكتىڭ, تەلەفونداردىڭ, تەلەديداردىڭ ومىردەگى ءمانىسى زور ەكەنىنە سەندىرەدى. ادامنىڭ قارىم-قاتىناسى قۇنسىزدانىپ قالدى. باتىستا ادامدار ءبىر-بىرىمەن تىلدەسۋدەن قالدى.
باقبەرگەن امالبەك,
«ەگەمەن قازاقستان».
كوكشەتاۋ.