ورتالىق سايلاۋ كوميسسياسىنىڭ توراعاسى ق.تۇرعانقۇلوۆ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن بايقاۋ جونىندەگى ەقىۇ/دياقب ميسسياسىنىڭ باسشىسى كورنەليا ۆيللەميەن انكە يونكەر حانىممەن كەزدەستى.
كەزدەسۋگە, سونداي-اق, ەقىۇ/دياقب ميسسياسى باسشىسىنىڭ ورىنباسارى مەگان ماككەيب فيتتسجەرالد, ورتسايلاۋكوم ءتوراعاسىنىڭ ورىنباسارى ۆ.ك.فووس, وسك مۇشەلەرى ت.ۆ.وحلوپكوۆا مەن م.ا.ءسارسەمباەۆ, ەقىۇ/دياقب ميسسياسىنىڭ قۇقىقتىق ماسەلەلەر ءجونىندەگى مامانى مەرسە كاستەللس ۆيسەنتە, سايلاۋ ماسەلەلەرى جونىندەگى مامانى لۋسيان راۋل ميۋرەسان جانە ەقىۇ/دياقب-نىڭ سايلاۋ جونىندەگى كەڭەسشىسى راديۆوە گرۋيچ قاتىستى.
ورتسايلاۋكوم باسشىسى يونكەر حانىمدى ورتالىق سايلاۋ كوميسسياسىنىڭ كەزەكتەن تىس سايلاۋدى ازىرلەۋ جانە وتكىزۋ ءجونىندەگى جۇمىسىمەن, سايلاۋ ناۋقانىنىڭ نەگىزگى كەزەڭدەرى جانە ونىڭ ەرەكشەلىكتەرىمەن تانىستىردى.
«ءبىز ىنتىماقتاستىققا دايىنبىز, حالىقارالىق بايقاۋشىلار ءۇشىن اشىقپىز جانە ولاردىڭ بايقاۋعا قاتىسۋىن الداعى سايلاۋدىڭ جاريالى, ترانسپارەنتتىك, ايقىندىق احۋالىن قامتاماسىز ەتۋگە, سايلاۋ پروتسەسىنە بارلىق قاتىسۋشىلاردىڭ بىزگە دەگەن سەنىمىن ارتتىرۋعا سەبەپتەسۋ رەتىندە قاراستىرامىز», دەپ اتاپ ءوتتى ق.تۇرعانقۇلوۆ.
ەقىۇ/دياقب ميسسياسىنىڭ باسشىسى سايلاۋ ناۋقانى بارىسىن بايقاۋعا قاتىسۋعا شاقىرۋ ءۇشىن ريزاشىلىعىن, سونىمەن قاتار, ميسسيا ساراپشىلارىنىڭ ورتسايلاۋكوم مۇشەلەرىمەن سايلاۋ پروتسەسىنىڭ بارلىق اسپەكتىلەرىندەگى ىنتىماقتاستىعى تىعىز جانە كاسىبي بولاتىندىعىنا سەنىم ءبىلدىردى. «ىنتىماقتاستىق وڭ جانە ءتيىمدى بولارىنا سەنىم بىلدىرەمىز, – دەدى ول. – بىزدە ءوزارا ءىس-قيمىل تاجىريبەسى بار. ورتسايلاۋكوم وكىلدەرى ميسسيا وكىلدەرىن بۇكىل ناۋقان بويى قىزىقتىرعان بارلىق ماسەلەلەردى جۇمىس بابىندا تالقىلاي الادى دەپ ويلايمىن».
كەزدەسۋ بارىسىندا, سونداي-اق, قازاقستاندىق بيلىك پەن سايلاۋ ورگاندارى سايلاۋ ناۋقانى سايلاۋ زاڭناماسىنىڭ نورمالارى مەن دەموكراتيالىق سايلاۋدىڭ جالپىعا تانىمال حالىقارالىق قاعيداتتارىنا قاتاڭ سايكەس تۇردە وتەتىنىنە بار كۇشىن سالاتىنى اتاپ ءوتىلدى.
كەزدەسۋ سوڭىندا ق.تۇرعانقۇلوۆ ەقىۇ/دياقب ميسسياسىنىڭ ساراپشىلارىنا سايلاۋدى ءادىل جانە ادال بايقاۋدا تابىس تىلەدى. «ميسسيا ساراپشىلارىنىڭ, ورتسايلاۋكوم مۇشەلەرى مەن بارلىق سايلاۋ پروتسەسىنە قاتىسۋشىلاردىڭ مۇددەسى تولىعىمەن سايكەس كەلەدى دەپ ويلايمىن», دەپ اتاپ ءوتتى ول.