الماتىدا مەملەكەتتىك كەڭەسشى ەرلان قاريننىڭ توراعالىعىمەن «قازاقستان تاريحى: ەجەلگى داۋىردەن بۇگىنگە دەيىن» اتتى جەتى تومدىق اكادەميالىق باسىلىمدى ازىرلەۋ بويىنشا رەداكتسيا القاسىنىڭ كەزەكتى وتىرىسى ءوتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
جيىندا كەڭەستىك كەزەڭدەگى قازاقستان تاريحىنا ارنالعان التىنشى تومنىڭ قولجازباسى قارالدى.
رەداكتسيا القاسى مۇشەلەرىنىڭ ۇسىنىستارى نەگىزىندە جاڭارعان التىنشى تومنىڭ تۇجىرىمداماسىن, قۇرىلىمى مەن مازمۇنىن اۆتورلار ۇجىمىنىڭ جەتەكشىسى, تاريح عىلىمدارىنىڭ كانديداتى كۇلعازيرا بالتاباەۆا تانىستىردى. قوسىمشا رەداكتسيالىق جۇمىس بارىسىندا 120-دان استام ەسكەرتۋ مەن ۇسىنىس نازارعا الىندى. جالپى العاندا التىنشى توم 7 بولىمنەن, 19 تاراۋدان جانە 126 پاراگرافتان تۇرادى. اۆتورلار ۇجىمىنىڭ قۇرامىنا 70-تەن استام عالىم مەن زەرتتەۋشى ەنگەن.
سونىمەن قاتار تاريح عىلىمدارىنىڭ دوكتورى, پروفەسسور بۇركىتباي اياعاننىڭ, الەۋمەتتانۋ عىلىمدارىنىڭ دوكتورى, فيلوسوفيا, ساياساتتانۋ جانە ءدىنتانۋ ينستيتۋتىنىڭ باس ديرەكتورى ايگۇل سادۋاقاسوۆانىڭ, «التەرناتيۆا» وزەكتى زەرتتەۋلەر ورتالىعىنىڭ ديرەكتورى, ساياسي عىلىمدارىنىڭ كانديداتى اندرەي چەبوتارەۆتىڭ رەتسەنزيالارى تىڭدالدى.
سونداي-اق رەداكتسيا القاسىنىڭ مامبەت قويگەلديەۆ, كەنجەحان ماتىجانوۆ, ديحان قامزابەك ۇلى, نۇرسان ءالىمباي, ەركىن ءابىل, حانكەلدى ءابجانوۆ سەكىلدى مۇشەلەرى ءوز وي-پىكىرلەرىن ورتاعا سالدى.
وتىرىس قورىتىندىسى بويىنشا رەداكتسيا القاسى التىنشى تومنىڭ قولجازباسىن بەكىتىپ, باسپاعا دايىنداۋ تۋرالى شەشىم قابىلدادى.
كەلەسى وتىرىستا «قازاقستان تاريحى: ەجەلگى داۋىردەن بۇگىنگە دەيىن» اتتى اكادەميالىق باسىلىمنىڭ تاۋەلسىز قازاقستان كەزەڭىنە ارنالعان جەتىنشى تومى قاراستىرىلادى.
ەسكە سالا كەتەيىك, بۇعان دەيىن رەداكتسيا القاسى بەسىنشى تومنىڭ قولجازباسىن بەكىتىپ, باسپاعا دايىنداۋ تۋرالى شەشىم قابىلدادى.