2016 جىلعى وليمپيادا ويىندارىنىڭ قولا جۇلدەگەرى دەنيس ۇلانوۆ اۋىر اتلەتيكاداعى كاسىبي مانسابىن اياقتاعانىن جاريالادى. ەندى ول باپكەرلىك قىزمەتپەن اينالىسادى, دەپ حابارلايدى Egemen.kz.
32 جاستاعى سپورتشىنىڭ كاسىبي سپورتتان كەتۋىنە سوزىلمالى جاراقاتتار جانە جاس ەرەكشەلىگى سەبەپ بولعان.
ەندى ۇلانوۆ بار كۇش-جىگەرىن باپكەرلىك قىزمەتكە ارنايدى جانە بۇل باعىتتا بەلسەندى ەڭبەك ەتىپ جاتىر.
دەنيس ۇلانوۆقا ريو وليمپياداسىنىڭ قولا جۇلدەسى تابىس ەتىلدى
قازاق سپورتشىسىنىڭ باستى تابىسى – 2016 جىلى ريو وليمپياداسىندا قولا مەدال جەڭىپ الۋى. باستاپقىدا ۋلانوۆ برازيليادا وتكەن وليمپيادادا ءتورتىنشى ورىن العان بولاتىن. الايدا كەيىن رۋمىن سپورتشىسى گابريەل سينكراياننىڭ قانىنان تىيىم سالىنعان زات تابىلىپ, ناتيجەسىندە قازاقستاندىق اتلەتكە «قولا» بۇيىردى.
سونىمەن قاتار ول جاستار اراسىندا ازيا چەمپيونى (2013 – 94 كگ), الەمدىك گران-پري كەزەڭىنىڭ جەڭىمپازى (2015 – 94 كگ), ازيا چەمپيونى (2016 – 85 كگ), ۋنيۆەرسيادا چەمپيونى (2017 – 85 كگ), ازيا چەمپيوناتىنىڭ قولا جۇلدەگەرى (2019 – 81 كگ), ۇلىبريتانيا اشىق چەمپيوناتىنىڭ جەڭىمپازى (2019 – 81 كگ) جانە قازاقستان رەسپۋبليكاسىنىڭ سپورت شەبەرى.