ەلورداداعى «Barys Arena» كەشەنىندە Counter-Strike 2 بويىنشا ءوتىپ جاتقان PGL Astana 2026 حالىقارالىق ءتۋرنيرىنىڭ ەكىنشى ويىن كۇنى اياقتالدى, دەپ حابارلايدى Egemen.kz.
جارتىلاي فينال كەزەڭىندە استاناداعى ارەنادا شامامەن 9 مىڭ كورەرمەن باس قوستى. ال ونلاين ترانسلياتسيالاردىڭ جالپى اۋديتورياسى 500 مىڭعا جۋىق كورەرمەنگە جەتتى. بۇل تۋرنيرگە حالىقارالىق قىزىعۋشىلىقتىڭ جوعارى ەكەنىن كورسەتىپ, استانانىڭ الەمدىك كيبەرسپورتتىڭ ماڭىزدى الاڭدارىنىڭ ءبىرى رەتىندەگى ستاتۋسىن نىعايتا ءتۇستى.
16 مامىر كۇنى كورەرمەندەر ءتۋرنيردىڭ جارتىلاي فينالدىق ماتچتارىن تاماشالاپ, ونىڭ قورىتىندىسى بويىنشا گراند-فينالعا جولداما العان كوماندالار انىقتالدى. العاشقى جارتىلاي فينالدا ەۋروپالىق Team Spirit ۇجىمى گەرمانيالىق MOUZ كومانداسىن جەڭدى.
ويىن كۇنىنىڭ ەكىنشى ماتچىندا Team Falcons كومانداسى قۇرامىندا قازاقستاندىق Moon ونەر كورسەتكەن MAGIC كومانداسىمەن كەزدەستى. جەرگىلىكتى جانكۇيەرلەردىڭ قىزۋ قولداۋىنا قاراماستان, Falcons جەڭىسكە جەتىپ, فينالعا شىقتى. ەندى ولار شەشۋشى كەزدەسۋدە Team Spirit-پەن باق سىناسادى.
جانكۇيەرلەردىڭ ايتۋىنشا, ءتۋرنيردىڭ ەكىنشى ويىن كۇنى ءتىپتى اسەرلى بولعان.
«مەن PGL ءتۋرنيرى ءۇشىن استاناعا العاش رەت كەلىپ تۇرمىن جانە ەرەكشە اسەر الدىم. ارەنا زاماناۋي, جانكۇيەرلەر كوماندالاردى وتە بەلسەندى قولدايدى. كيبەرسپورتتىڭ مۇندا جوعارى دەڭگەيدە دامىپ جاتقانى بايقالادى», دەدى شەتەلدىك قوناقتاردىڭ ءبىرى.
تۋرنير 17 مامىر كۇنى جالعاسادى. جارىستىڭ سوڭعى كۇنى كورەرمەن حالىقارالىق ءتۋرنيردىڭ جەڭىمپازى انىقتالاتىن شەشۋشى ماتچقا كۋا بولادى.
ەسكە سالا كەتەيىك, جۇلدە قورى 1,6 ميلليون دوللاردى قۇرايتىن ءتۋرنيردى PGL Esports SRL ۇيىمداستىردى.