«بارسەلونا» كلۋبىنىڭ شابۋىلشىسى روبەرت لەۆاندوۆسكي كاتالونيالىق ۇجىمنان كەتەتىنىن رەسمي تۇردە مالىمدەدى, دەپ حابارلايدى Egemen.kz.
پولشالىق فورۆارد كاتالونيالىق كلۋب ساپىندا ءتورت ماۋسىم وتكىزىپ, ودان كەيىن كوماندامەن قوشتاسىپ وتىر. ول وسى ۋاقىت ىشىندە 191 ماتچقا قاتىسىپ, 119 گول سوقتى. «بارسەلونامەن» بىرگە شابۋىلشى يسپانيانىڭ ءۇش دۇركىن چەمپيونى اتانىپ, ەل كۋبوگىن جانە ءۇش رەت يسپانيا سۋپەركۋبوگىن جەڭىپ الدى.
37 جاستاعى فۋتبولشى بۇل شەشىمى تۋرالى الەۋمەتتىك جەلىدەگى پاراقشاسىندا مالىمدەدى.
«سىناقتار مەن اۋىر جۇمىسقا تولى ءتورت جىلدان كەيىن العا جىلجيتىن ۋاقىت كەلدى. مەن ءوز ميسسيامدى ورىندادىم دەگەن سەزىممەن كەتىپ بارامىن. العاشقى كۇننەن باستاپ جانكۇيەرلەردەن كورگەن ماحابباتتى ەشقاشان ۇمىتپايمىن. كاتالونيا – مەنىڭ جەر بەتىندەگى مەكەنىم. وسى ءتورت تاماشا جىل ىشىندە جولىقتىرعان جانداردىڭ بارلىعىنا راقمەت», دەپ جازدى لەۆاندوۆسكي.
سونداي-اق شابۋىلشى كلۋب پرەزيدەنتى جوان لاپورتاعا «بارسەلونانىڭ» ءبىر بولشەگى بولۋعا مۇمكىندىك بەرگەنى ءۇشىن ەرەكشە العىس ايتتى.
بۇعان دەيىن يسپانيا پرەمەر-ءمينيسترىنىڭ پالەستينا تۋىمەن شىققان «بارسەلونا» ويىنشىسىن قولداعانىن جازعان ەدىك.
ەستەرىڭىزگە سالا كەتەيىك, 15 جاستاعى قازاقستاندىق شابۋىلشى كارىم مەڭدىقانوۆ «بارسەلونا» كلۋبىمەن كەلىسىمشارتقا وتىردى.