پرەزيدەنت قاسىم-جومارت توقاەۆ 15 مامىر كۇنى تۇركىستاندا وتكەن تۇركى مەملەكەتتەرى ۇيىمى بەيرەسمي ءسامميتىنىڭ قورىتىندىسى بويىنشا جينالىس وتكىزىپ, ماڭىزدى حالىقارالىق ءىس-شاراعا جان-جاقتى دايىندالعان وبلىس اكىمى نۇرالحان كوشەروۆ پەن ءوڭىر تۇرعىندارىنا ريزاشىلىعىن ءبىلدىردى. بۇل تۋرالى پرەزيدەنتتىڭ كەڭەسشىسى – ءباسپاسوز حاتشىسى ايبەك سمادياروۆ مالىمدەدى, دەپ جازادى Egemen.kz.
وسى اتقارىلعان جۇمىستىڭ ارقاسىندا تۇركى جۇرتىنىڭ قاسيەتتى قاراشاڭىراعى سانالاتىن تۇركىستان قالاسى مادەني-گۋمانيتارلىق ىقپالداستىقتىڭ الەۋەتتى ورتالىعى رەتىندە ءىرى حالىقارالىق ءىس-شارالاردى وتكىزۋگە ءازىر ەكەنىن كورسەتتى.
پرەزيدەنتتىڭ ايتۋىنشا, شەت مەملەكەتتەردىڭ باسشىلارى مەن سامميتكە قاتىسۋشىلار كولىك جولدارىنىڭ ساپاسىنا, جاسىل جەلەگى مول كوشەلەردىڭ, ساياباقتاردىڭ تازالىعىنا جوعارى باعا بەرگەن.
مەملەكەت باسشىسى وبلىس جانە قالا اكىمىنە ەلىمىزدىڭ عانا ەمەس, تۇتاس ءوڭىردىڭ جاۋھارى – كونە تۇركىستان شاھارىن دامىتۋ مەن اباتتاندىرۋ جۇمىستارىنا ايرىقشا ءمان بەرۋدى تاپسىردى.
سونىمەن قاتار پرەزيدەنت قازاقستاننىڭ ابىروي-بەدەلى ءۇشىن ادال ەڭبەك ەتكەن اكىمدىك پەن مەملەكەتتىك مەكەمەلەردىڭ, اسكەري جانە قۇقىق قورعاۋ ورگاندارىنىڭ قىزمەتكەرلەرىن, كوممۋنالدىق قىزمەت جۇمىسشىلارىن, ەرىكتىلەردى, سونداي-اق باسقا دا بەلسەندىلەردى مەملەكەتتىك ناگرادالارمەن, قۇرمەت گراموتالارىمەن جانە العىس حاتتارمەن ماراپاتتاۋ تۋرالى شەشىم قابىلداعانىن جەتكىزدى.
ەسكە سالا كەتەيىك, 13 مامىردا تۇركيا پرەزيدەنتى رەجەپ تايپ ەردوعان قازاقستانعا مەملەكەتتىك ساپارمەن كەلدى. ونى اۋەجايدا قاسىم-جومارت توقاەۆ ءوزى قارسى الدى. مەملەكەت باسشىسى قاسىم-جومارت توقاەۆ الەۋمەتتىك جەلىدەگى پاراقشاسىندا رەجەپ تايپ ەردوعانمەن بىرگە تۇسكەن فوتوسىن جاريالادى.
15 مامىردا مەملەكەت باسشىسى قاسىم-جومارت توقاەۆتىڭ قاتىسۋىمەن تۇركى مەملەكەتتەرى ۇيىمىنىڭ بەيرەسمي ءسامميتى ءوتتى.
وزبەكستان پرەزيدەنتى تۇركىستان حالقىنا ەرەكشە تارتۋ جاسادى