مەملەكەت باسشىسى: ونەركاسىپ سالاسىنداعى ىنتىماقتاستىقتى ودان ءارى دامىتۋ قاجەت

«بۇل سالادا ناقتى جەتىستىكتەرىمىز بار. وسى كەزگە دەيىن قازاق-تۇرىك ىسكەرلىك توپتارىنىڭ بىرلەسكەن كۇش-جىگەرىنىڭ ارقاسىندا جالپى قۇنى 7,6 ميلليارد دوللارعا تەڭ 142 جوبا جۇزەگە استى. سولاردىڭ قاتارىندا تۇرعان YDA Holding كومپانياسىن اتاپ وتكىم كەلەدى. بۇل كومپانيا ەلىمىزدە كوپسالالى ءوندىرىس كەشەنىن اشتى. سونىمەن قاتار اليۋميني ءوندىرىسىن جانداندىرىپ, مەديتسينالىق بۇيىمدار شىعارىپ جاتىر. ال Panelsan, Betek Boya كاسىپورىندارى قۇرىلىس جانە حيميا ونەركاسىبىنە قاتىستى جوبالاردى جۇزەگە اسىرىپ جاتىر. Aksa Energy كومپانياسى قىزىلوردا وبلىسىندا زاماناۋي ەلەكتر ستانتسياسىن ىسكە قوستى. بۇل جوبالار قازاقستاننىڭ وندىرىستىك قۋاتىن ارتتىرۋعا سەپتىگىن تيگىزەرى انىق», دەدى قاسىم-جومارت توقاەۆ. 

پرەزيدەنتتىڭ پىكىرىنشە, كولىك-لوگيستيكا سالاسىنداعى بايلانىستى نىعايتۋ ايرىقشا ماڭىزدى.

«قازاقستان – قىتاي مەن ەۋروپانى جالعاپ تۇرعان مەملەكەتتەردىڭ ءبىرى. قازىر وسى باعىتتاعى جۇك تاسىمالىنىڭ 85 پايىزى ءبىزدىڭ ەلىمىز ارقىلى وتەدى. ترانسكاسپي حالىقارالىق كولىك باعىتى, ياعني, ورتا ءدالىز, قازاقستاننىڭ تاسىمال سالاسىنداعى الەۋەتىن ارتتىرۋعا وڭ ىقپال ەتىپ وتىر. سوڭعى جىلدارى وسى ءدالىز ارقىلى وتكەن جۇك كولەمى 5 ەسەدەن استام ءوستى. بىلتىر كونتەينەرلىك جۇك تاسىمالى 36 پايىزعا كوبەيدى. كوپ ۇزاماي بۇل كورسەتكىشتى 10 ميلليون تونناعا جەتكىزۋدى كوزدەپ وتىرمىز. ءبىز ترانزيتتىك تاسىمال جۇيەسىن ءتيىمدى ۇيلەستىرۋ ءۇشىن «Smart Cargo» بىرىڭعاي تسيفرلىق باسقارۋ پلاتفورماسىن ازىرلەدىك. جالپى, ورتا ءدالىزدىڭ مۇمكىندىگىن ارتتىرۋ بارشامىزدىڭ مۇددەمىزگە ساي كەلەدى. سوندىقتان تۇرىك تاراپىنا «e-permit» جوباسىن بىرگە جۇزەگە اسىرۋدى ۇسىنامىز. بۇل جوبا جۇك راسىمدەرىن ەلەكتروندى تۇردە, ياعني, مەيلىنشە اشىق جۇرگىزۋگە مۇمكىندىك بەرەدى. سونداي-اق اكىمشىلىك شىعىنداردى ازايتادى. «ورتا ءدالىز» جوباسىن «ترامپتىڭ حالىقارالىق بەيبىتشىلىك جانە وركەندەۋ جولى» (TRIPP) باستاماسىمەن ۇشتاستىرۋ ماڭىزدى دەپ سانايمىن. بۇدان بولەك, تۇرىك كاسىپكەرلەرى ەلىمىزدىڭ اۋەجاي ينفراقۇرىلىمىنا قوماقتى ينۆەستيتسيا سالعانىن ەرەكشە اتاپ وتكەن ءجون. قازىر TAV Holding كومپانياسى الماتىداعى حالىقارالىق تەرمينالدى جاڭعىرتىپ جاتىر. ال S Sistem Lojistik كومپانياسى اقتوبە اۋەجايىندا لوگيستيكا ورتالىعىن سالۋدى جوسپارلاپ وتىر. بۇل جوبالار قازاقستانداعى اۋە تاسىمالىنىڭ الەۋەتىن ارتتىرۋعا جول اشادى», دەدى مەملەكەت باسشىسى.

قاسىم-جومارت توقاەۆ پەن رەجەپ تايپ ەردوعان قازاقستان-تۇركيا بيزنەس فورۋمىنا قاتىستى

سونىمەن قوسا, قاسىم-جومارت توقاەۆ اگروونەركاسىپ جانە اۋىل شارۋاشىلىعى سالاسىنداعى ىنتىماقتاستىقتى كۇشەيتۋ قاجەت ەكەنىن مالىمدەدى

«قازاقستان ەگىن القاپتارىنىڭ اۋماعى بويىنشا الەمدە التىنشى ورىندا تۇر. سونداي-اق ەلىمىز استىق ەكسپورتتايتىن ەڭ ءىرى ون مەملەكەتتىڭ قاتارىنا كىرەدى. بىلتىر ديقاندارىمىز 27 ميلليون توننا استىق جينادى. سوڭعى بەس جىلدا اۋىل شارۋاشىلىعى ونىمدەرىنىڭ ەكسپورتى 1,8 ەسە ءوستى. وسىلايشا, قازاقستان Global Food Security يندەكسى بويىنشا 32-ءشى ورىندا تۇر. بىلتىر ەكى ەل اراسىنداعى اۋىل شارۋاشىلىعى ونىمدەرىنىڭ الىس-بەرىسى 25 پايىزعا ارتتى. الايدا, ەلدەرىمىزدىڭ بۇل سالاداعى الەۋەتى زور. مىسالى, Tiryaki Holding كومپانياسى استانادا بيداي مەن بۇرشاقتى تەرەڭ وڭدەيتىن زاۋىت سالماقشى. سونداي-اق İskefe Holding كاسىپورنى جەلاتين ءوندىرىسىن قولعا الماق. Alarko Holding كومپانياسى شىمكەنتتە جىلىجاي كەشەنىن سالۋدى جوسپارلاپ وتىر. وسى جوبالاردىڭ بارلىعى وڭدەۋ ونەركاسىبىن وركەندەتىپ, ەكسپورتتىق الەۋەتىمىزدى ارتتىرۋعا سەپتىگىن تيگىزەدى دەپ سەنەمىن. بۇدان بولەك, ءبىز زاماناۋي اگروتەحنولوگيانى ەنگىزۋگە, سۋارۋ جۇيەسىن دامىتۋعا ەرەكشە ءمان بەرىپ وتىرمىز. سونداي-اق ۆەتەريناريا جانە فيتوسانيتاريا سالالارىندا بىرلەسە جۇمىس ىستەۋگە نيەتتىمىز. ءوز تاراپىمىزدان تۇركياعا «حالال» ستاندارتىنا ساي كەلەتىن ەت ونىمدەرىن ەكسپورتتاۋعا دايىنبىز», دەدى پرەزيدەنت.

پرەزيدەنت: بيزنەسكە قولايلى جاعداي جاساۋ مەملەكەتتىك ساياساتتىڭ باسىم باعىتىنىڭ ءبىرى

مەملەكەت باسشىسى وتاندىق فارماتسەۆتيكا ونەركاسىبى مەن مەديتسينا ينفراقۇرىلىمىن دامىتۋدى وتە ماڭىزدى باعىت سانايتىنىن جەتكىزدى

«تۇركيانىڭ Abdi İbrahim جانە Nobel سەكىلدى ءدارى-دارمەك وندىرەتىن ءىرى كومپانيالارى شەتەلدەگى العاشقى زاۋىتتارىن قازاقستاندا اشقان بولاتىن. YDA Group تۇركىستان جانە پەتروپاۆل قالالارىندا كوپبەيىندى اۋرۋحانالار سالىپ جاتىر. ال Orzax Group كومپانياسى تۇركىستان وبلىسىندا بيولوگيالىق بەلسەندى قوسپالار وندىرەتىن زاۋىت سالماقشى. ءبىز بۇل باستامالاردى تولىق قۇپتايمىز. ەلىمىز تۇرىك كومپانيالارىمەن تىعىز جۇمىس ىستەۋگە جانە ولارعا قولايلى جاعداي جاساۋعا ءازىر. وسى جوبالار قازاقستاننىڭ ايماقتاعى ءدارى-دارمەك وندىرەتىن جانە ونى ەكسپورتتايتىن ورتالىق رەتىندە قالىپتاسۋىنا زور ىقپال ەتەرى انىق», دەدى قاسىم-جومارت توقاەۆ.