اقتوبە. 27 اقپان. اقتوبەدە «قاۋىپسىز قالا» اكتسياسى ۇيىمداستىرىلىپ, جەرگىلىكتى پوليتسەيلەر 1 388 اكىمشىلىك قۇقىق بۇزۋشىلىقتى انىقتادى. بۇل تۋرالى egemen.kz ءتىلشىسى حابارلادى.
«قاۋىپسىز قالا» جەدەل-پروفيلاكتيكالىق ءىس-شارا بارىسىندا قاجەتتى قۇقىقتىق ءتارتىپتى ساقتاۋ, ەسكەرتۋ, قىلمىستاردىڭ الىن الۋ, «مۇلدەم توزبەۋشىلىك» تارتىبىمەن اكىمشىلىك قۇقىق بۇزۋشىلىقتاردى انىقتاۋ سىندى ماسەلەلەر كۇن تارتىبىنە قويىلدى. سوعان وراي, وبلىس بويىنشا 400 ىشكى ىستەر ورگانىنىڭ قىزمەتكەرى, 150 اسكەري قىزمەتشى جانە 100 كولىك جۇمىلدىرىلدى. جەدەل الدىن الۋ ءىس-شاراسى كەزەڭىندە جۇمىلدىرىلعان جاساقتارمەن «ءىزى سۋىماي» 30 قىلمىس اشىلدى. ماسەلەن, 24 اقپاندا ساعات تۇنگى 01.55-تە «102» تەلەفونىنا قالاداعى ءدامحانالاردىڭ بىرىندە جاستاردىڭ جينالىپ جاتقانى تۋرالى انونيمدىك اقپارات ءتۇستى. وقيعا ورنىنا كەلگەن پوليتسيا قىزمەتكەرلەرىنە 28 جاستاعى جىگىت شاعىمدانىپ, بەلگىسىز ادامداردىڭ سەبەپسىز بۇزاقىلىق نيەتپەن ۇرىپ كەتكەنىن ايتقان. جاساقتىڭ جىلدام قيمىلداۋىنىڭ ارقاسىندا كوپ قاباتتى ۇيلەردىڭ اۋلاسىنان ءۇش جاس جىگىت قولعا ءتۇستى.
ءۇش كۇنگە سوزىلعان شارادا 1 388 اكىمشىلىك قۇقىق بۇزۋشىلىق انىقتالدى. ونىڭ ىشىندە ۇساق بۇزاقىلىق 40, ىشىمدىك ءىشۋ نەمەسە قوعامدىق جەردە ماس كۇيىندە ءجۇرۋ 138, بەلگىلەنبەگەن جەرلەردە شىلىم شەگۋ 98, كولىكتى ماس كۇيىندە باسقارۋ 42 مارتە تىركەلگەنى ءمالىم بولدى. جىل باسىنان بەرى 3 375 تەكسەرۋ جۇرگىزىلدى. ناتيجەسىندە, 1 691 قۇقىق بۇزۋشى قولعا ءتۇسىپ, ىشكى ىستەر ورگانىنا 276 ادام جەتكىزىلدى.
ساتىبالدى ءساۋىرباي.
دەرەك: egemen.kz.
سۋرەت: nur.kz.