ۇلىبريتانيانىڭ حەروگەيت قالاسىندا Institution of Engineering and Technology ۇيىمداستىرعان بەدەلدى UK First Lego League Championship حالىقارالىق روبوتوتەحنيكا چەمپيوناتىندا قازاقستان نامىسىن قورعاعان ەلوردالىق وقۋشىلار زور جەتىستىككە جەتتى. ولار ەكى بىردەي باستى ماراپاتتى يەلەنىپ, ەل مەرەيىن اسقاقتاتتى, دەپ جازادى Egemen.kz.
استانا قالاسىنىڭ قۇراماسى بايراقتى باسەكەدە روبوت-ويىن بويىنشا ءبىرىنشى ورىنعا يە بولىپ, سونداي-اق جارىستىڭ ۇزدىك كومانداسى اتاندى. بۇل – حالىقارالىق دەڭگەيدەگى جوعارى دايىندىق پەن جۇيەلى ەڭبەكتىڭ ايقىن ناتيجەسى.
اتالعان چەمپيوناتقا ۇلىبريتانيا, برازيليا, فرانتسيا, گەرمانيا, سلوۆاكيا سىندى ەلدەردەن بارلىعى 68 كوماندا قاتىستى. ەلوردالىق كوماندا بۇل دوداعا استانادا وتكەن Central Asia First Championship تۋرنيرىندە جولداما العان ەدى.
قازاقستاندىق وقۋشى سينگاپۋردا وتكەن روبوتوتەحنيكا چەمپيوناتىندا كۇمىس جۇلدە يەلەندى
جارىس بارىسىندا وقۋشىلار تەك روبوت-ويىنمەن شەكتەلمەي, «artifacts.kz» اتتى جوباسىن دا تانىستىردى. بۇل – قازاقستانداعى ارحەولوگيالىق ارتەفاكتىلەردىڭ ونلاين-بازاسىن قالىپتاستىرۋعا باعىتتالعان تىڭ باستاما. جوبا اياسىندا قاتىسۋشىلار يدەيادان باستاپ زەرتتەۋ, تەحنيكالىق ازىرلەۋ جانە ءپروفيلدى ينستيتۋتتارمەن بايلانىس ورناتۋعا دەيىنگى تولىق پروتسەستى قامتىدى.
ساراپشىلار اتالعان جوبانى تەحنولوگيالىق دەڭگەيى جوعارى ءارى ۇلتتىق مادەني مۇرانى ساقتاۋعا قوسقان ناقتى ۇلەسى ءۇشىن ەرەكشە اتاپ ءوتتى. بۇل باستاما جاس بۋىننىڭ عىلىم مەن تەحنولوگيانى يگەرۋمەن قاتار, تاريحي قۇندىلىقتارعا دەگەن جاۋاپكەرشىلىگىن دە ايقىن كورسەتتى.
سقو-دا ءىت-ورتالىقتار اشىلدى: اۋىل جاستارى روبوتوتەحنيكانى مەڭگەرەدى