الماتىداعى ۇلتتىق ورتالىق مۋزەيدە ء«بىر اسپان استىندا» اتتى حالىقارالىق زاماناۋي ونەر كورمەسى ءوز جۇمىسىن باستادى. اۋقىمدى مادەني جوبا الەمنىڭ تۇكپىر-تۇكپىرىنەن كەلگەن سۋرەتشىلەردىڭ باسىن قوسىپ, ونەردىڭ شەكاراسىز كەڭىستىگىن تاعى ءبىر مارتە دالەلدەدى, دەپ حابارلايدى Egemen.kz.
كورمەگە ەۋروپا, ازيا, اراب الەمى, اقش, رەسەي, مولدوۆا, ارمەنيا جانە وزبەكستان ەلدەرىنەن 70-تەن استام سۋرەتشى قاتىسىپ وتىر. ولار بەينەلەۋ ونەرى, ساندىك-قولدانبالى ونەر, فوتوگرافيا, ءسان ديزاينى, ۆيدەوارت جانە ماتەريالدىق تاجىريبەلەر باعىتىنداعى تۋىندىلارىن قازاقستاندا العاش رەت كوپشىلىك نازارىنا ۇسىندى.
جوبا ينكليۋزيۆتى حالىقارالىق پلاتفورما رەتىندە ۇيىمداستىرىلعان. ونىڭ باستى ماقساتى – ءارتۇرلى مادەنيەتتەر مەن كوركەمدىك كوزقاراستاردى ءبىر كەڭىستىكتە توعىستىرىپ, شىعارماشىلىق ارقىلى ءوزارا تۇسىنىستىك پەن ۇيلەسىمدىلىكتى ناسيحاتتاۋ. كورمە ادامزاتتىڭ ورتاق قۇندىلىقتارىن العا شىعارىپ, ايىرماشىلىقتاردى ەمەس, بىرلىكتى دارىپتەيتىن يدەياعا نەگىزدەلگەن.
كورمەنىڭ ارنايى ءبولىمى زاماناۋي اراب ونەرىنە ارنالعان. بۇل بولىمدە پارسى شىعاناعى ەلدەرى – باحرەين, ساۋد ارابياسى, بىرىككەن اراب امىرلىكتەرى, كاتار, ومان, سونداي-اق يوردانيا مەن يراك سۋرەتشىلەرىنىڭ جۇمىستارى قويىلعان. اۆتورلار ءداستۇر مەن زاماناۋيلىقتىڭ اراسىنداعى بايلانىستى زەرتتەپ, مادەني مۇرا مەن قازىرگى كوركەمدىك ىزدەنىستەردى ۇشتاستىرعان.
جوبا اياسىندا ساۋد ارابياسىنىڭ تانىمال سۋرەتشىسى احمەد ءال ماگلۋتتىڭ جەكە ەكسپوزيتسياسى دا ۇسىنىلدى. ونىڭ شىعارمالارى قوعامدىق قاتىناستاردى, ءداستۇرلى ءومىر سالتىن جانە ايەلدەردىڭ قوعامداعى وزگەرىپ جاتقان ءرولىن تەرەڭ ءارى شىنايى بەينەلەۋىمەن ەرەكشەلەنەدى. سونىمەن قاتار سۋرەتشى قايىرىمدىلىق باعىتىنداعى باستامالارىمەن دە تانىمال.
كورمەگە قاتىسۋشىلار قاتارىندا ءباا-دەن كالسام بەلسەلاح, كاتاردان فارحان ءال شەيح ءال سايەد, ساۋد ارابياسىنان دجامەلا الحەرز, يراكتان موحانناد ءال-داۋد, ءليۆان/باا وكىلى كريستين ەل وجەيل, سونداي-اق سارا البانناي, الي احمادي, مارام حاسان سىندى شەبەرلەر بار. ولاردىڭ تۋىندىلارى ۇلتتىق بولمىس, مادەني جادى, سيمۆوليكا مەن زاماناۋي ەستەتيكانى ءتۇرلى قىرىنان كورسەتەدى.
جاپون ونەرىنەن شابىت العان kawaii ەستەتيكاسى دا كورمەدە ەرەكشە ورىن العان. بۇل باعىت نازىك سيۋررەاليزم مەن ەموتسيونالدىق كوپقاباتتىلىق ارقىلى ىشكى الەم مەن پسيحولوگيالىق تەرەڭدىكتى بەينەلەۋگە نەگىزدەلگەن.
ەۋروپالىق سۋرەتشىلەر – ۇلىبريتانيا, يسپانيا, يتاليا, پولشا جانە اۆستريا وكىلدەرى زاماناۋي ونەردەگى ەكسپەريمەنت پەن سۋبەكتيۆتى كوزقاراستاردى ۇسىنادى. ال رەسەي مەن ارمەنيا اۆتورلارى ساندىك-قولدانبالى ونەردەگى اۆتورلىق جۇمىستارىمەن ەرەكشەلەنەدى.
الماتىدا KITF 2026 كورمەسىنە 6 مىڭنان استام ادام قاتىستى
قازاقستان سۋرەتشىلەرى دە كورمەگە بەلسەندى قاتىسىپ جاتىر. ولار ۇلتتىق ءداستۇر مەن مادەني بىرەگەيلىكتى ويۋ-ورنەك, سيمۆوليكا جانە تۇستەر ارقىلى بەينەلەگەن. قاتىسۋشىلار قاتارىندا گۇلنار سۇيىنباەۆا, سەرىك تاينوۆ, قابىل حالىقوۆ, گۇلنارا تابانوۆا, ەلەنا فۋرسا, مارجان باقىتبەكوۆا, ايگۇل ساپاربەكوۆا جانە بيبىگۇل سماقوۆا بار.
جوبانىڭ تەڭ كۋراتورى ءارى ۇيىمداستىرۋشىسى – سۋرەتشى, پەداگوگ, قازاقستان رەسپۋبليكاسى ديزاينەرلەر وداعىنىڭ مۇشەسى بيبىگۇل سماقوۆا.
كورمەنىڭ اشىلۋ سالتاناتىندا سۋرەتشىلەر مەن سەرىكتەستەرگە لوندوننان شىققان Britrise برەندىنىڭ BritAlma سىيلىعى تابىستالدى.
استانادا «نۇر شاشۋ» حالىقارالىق كورمەسى اشىلدى
ء«بىر اسپان استىندا» كورمەسى – مادەنيەتتەر ديالوگىن دامىتىپ, ونەر ارقىلى ادامزاتتى بىرىكتىرۋگە باعىتتالعان ماڭىزدى حالىقارالىق جوبا.