الماتىدا وتاندىق عالىمداردىڭ ازىرلەمەلەرى نەگىزىندە جاڭا زاۋىت ىسكە قوسىلدى

جوبا Satbayev University عالىمدارىنىڭ قاتىسۋىمەن وتاندىق جوعارى وقۋ ورىندارى مەن عىلىمي ۇيىمدارمەن بىرلەسىپ جۇزەگە اسىرىلعان. عىلىمي توپ رەتسەپتۋرالاردى ازىرلەۋدەن جانە شيكىزاتتى ىرىكتەۋدەن باستاپ تەحنولوگيالىق پروتسەستەردى باپتاۋعا جانە سەريالىق ءوندىرىستى ىسكە قوسۋعا دەيىنگى جۇمىستاردىڭ تولىق تسيكلىن قامتاماسىز ەتتى.

جوبا مەملەكەت باسشىسى قاسىم-جومارت توقاەۆتىڭ ۋنيۆەرسيتەتتەر جانىنان تەحنولوگيالىق پاركتەر قۇرۋ جانە عىلىمدى ونەركاسىپ سالاسىنا ينتەگراتسيالاۋ جونىندەگى تاپسىرمالارىن ورىنداۋ اياسىندا ىسكە اسىرىلادى. Diatomite زاۋىتى – Satbayev University بازاسىندا جۇزەگە اسىرىلىپ جاتقان Technopark Stroytech ءىرى يننوۆاتسيالىق جوباسىنىڭ قۇرامداس بولىگى.

عىلىم جانە جوعارى ءبىلىم مينيسترلىگىنىڭ قولداۋىنا يە بولعان جوبا Satbayev University, د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى, م.اۋەزوۆ اتىنداعى وڭتۇستىك قازاقستان ۋنيۆەرسيتەتى, مەتاللۋرگيا جانە كەن بايىتۋ ينستيتۋتى, سونداي-اق يندۋستريالىق سەرىكتەس – «Savenergy» كومپانياسىنىڭ قاتىسۋىمەن جۇزەگە اسادى.

كۋرچاتوۆ عىلىم قالاشىعىنا اينالادى: دامۋ جوسپارى ازىرلەندى

«بۇل جوبا – ۋنيۆەرسيتەتتەردىڭ تەك كادر دايارلاۋ ورتالىعى عانا ەمەس, سونىمەن قاتار يندۋستريالىق دامۋدىڭ درايۆەرىنە اينالۋىنىڭ ناقتى ۇلگىسى. مۇنداي تاجىريبەنى ەلىمىزدىڭ بارلىق وڭىرىندە كەڭىنەن تاراتۋ جوسپارلانىپ وتىر», دەدى عىلىم جانە جوعارى ءبىلىم ءمينيسترى ساياسات نۇربەك.

جوبا جەرگىلىكتى مينەرالدىق شيكىزات پەن قايتا وڭدەلگەن ونەركاسىپتىك قالدىقتاردى پايدالانۋدى كوزدەيدى. Satbayev University پروفەسسورى-زەرتتەۋشىسى رۋسلان نۇرلىباەۆتىڭ ايتۋىنشا, ازىرلەنگەن تەحنولوگيالار جاڭا قۇرىلىس ماتەريالدارىن جاساپ قانا قويماي, ولاردى ونەركاسىپتىك وندىرىسكە ءساتتى ەنگىزۋگە مۇمكىندىك بەردى. وسىلايشا, بۇرىن پايدالانىلماعان قالدىقتار قۇرىلىس سالاسى ءۇشىن سۇرانىسقا يە رەسۋرسقا اينالىپ, ەكولوگيالىق جۇكتەمەنى ازايتۋعا جانە ءوندىرىستىڭ ەكونوميكالىق تيىمدىلىگىن ارتتىرۋعا ىقپال ەتەدى.

توقاەۆ جوعارى ءبىلىم مەن عىلىمي زەرتتەۋلەردى دامىتۋ بويىنشا بىرقاتار تاپسىرما بەردى

قولدانىلاتىن تەحنولوگيالىق شەشىمدەر پاتەنتتەرمەن قورعالعان. وندىرىلەتىن قۇرىلىس قوسپالارى جوعارى بەرىكتىك سيپاتتامالارىنا يە, ۇلتتىق ستاندارتتارعا سايكەس كەلەدى جانە ءتيىستى سەرتيفيكاتتاۋدان وتكەن. ونىمدەر قازىردىڭ وزىندە وتاندىق قۇرىلىس كومپانيالارى تاراپىنان قولدانىلىپ, ولاردىڭ ساپاسى مەن نارىقتاعى سۇرانىسىن راستاپ وتىر.

جاڭا كونستيتۋتسياسىندا ايقىندالعان ەلدىڭ ستراتەگيالىق باعىتىن ىسكە اسىرۋ اياسىندا ءبىلىم مەن تەحنولوگياعا نەگىزدەلگەن ەكونوميكانى دامىتۋ ايرىقشا ماڭىزعا يە. وسىعان بايلانىستى عىلىمي قاۋىمداستىقتى ەكونوميكانىڭ قولدانبالى سالالىق مىندەتتەرىن شەشۋگە تارتۋ باسىم باعىتتاردىڭ ءبىرى.

عىلىمي ءورىس باستاۋى

كاسىپورىن بازاسىندا جاڭا بۋىن ماماندارىن دايارلاۋعا ارنالعان وقۋ-زەرتحانالىق كەشەن جۇمىس ىستەيدى. ماگيسترانتتار مەن دوكتورانتتاردىڭ عىلىمي زەرتتەۋلەرگە قاتىسۋى, سونداي-اق يننوۆاتسيالىق قۇرىلىس ماتەريالدارىن سىناقتان وتكىزۋ كوزدەلگەن.

الداعى ۋاقىتتا ءونىم تۇرلەرىن كەڭەيتۋ, وندىرىستىك قۋاتتاردى ارتتىرۋ جانە تەحنولوگيالىق شەشىمدەردى ەلىمىزدىڭ وزگە وڭىرلەرىندەگى ۇقساس كاسىپورىنداردا ەنگىزۋ جوسپارلانعان.