الماتى وبلىسىنىڭ قاسكەلەڭ قالاسىندا الەمدىك دەڭگەيدەگى «Dala Stage» كينوپاۆيلونىنىڭ قۇرىلىسى باستالدى. بۇل جوبا ءوڭىردىڭ عانا ەمەس, تۇتاس ەلدىڭ كرەاتيۆتى يندۋسترياسىن جاڭا دەڭگەيگە كوتەرۋگە باعىتتالعان ماڭىزدى قادام بولىپ وتىر, دەپ جازادى Egemen.kz.
سالتاناتتى ءراسىم بارىسىندا گولليۆۋد جۇلدىزى دجەكي چان جىبەرگەن سيمۆوليكالىق ۋاقىت كاپسۋلاسى قۇرىلىس الاڭىنا تىكۇشاقپەن جەتكىزىلدى. ونى پاۆيلوندا تۇسىرىلەتىن العاشقى جوبا – «قۇدىرەتتى ساۋىت-سايمان 4: ۋلتيماتۋم» ءفيلمىنىڭ رەجيسسەرى روبەرت كۋن قابىلدادى.
شاراعا الماتى وبلىسىنىڭ اكىمى مارات سۇلتانعازيەۆ قاتىستى. سونىمەن قاتار دجەكي چاننىڭ پروديۋسەرى لي چيۋ ۆا جانە «DALA EDGE» كرەاتيۆتى جانە تەحنولوگيالىق يندۋستريالار پاركى, «Salem Entertainment» كومپانيالارىنىڭ باسشىلارى اراسىندا مەموراندۋمعا قول قويىلدى.
ايماق باسشىسى بۇل جوبانىڭ ماڭىزىن ەرەكشە اتاپ ءوتتى.
«قازىرگى زامان – اقىل-وي مەن تالانتتىڭ, وزىق تەحنولوگيا مەن جاڭا يدەيالاردىڭ ءداۋىرى. مەملەكەت باسشىسى كرەاتيۆتى ەكونوميكانى ىلگەرىلەتۋ ارقىلى ەل دامۋىنىڭ جاڭا كوكجيەگىن اشۋدى ستراتەگيالىق مىندەت رەتىندە ايقىنداعان. ءبىز وسى باعىتتاعى ماڭىزدى قادامعا كۋا بولىپ وتىرمىز», دەدى مارات سۇلتانعازيەۆ.
اكىمنىڭ ايتۋىنشا, «Dala Stage Creative Tech Park» تەك عيمارات ەمەس, ۇلتتىق مادەنيەت پەن زاماناۋي تەحنولوگيانى توعىستىراتىن جاڭا يندۋستريانىڭ نەگىزى. جوبا حالىقارالىق ستۋديالارمەن بىرلەسە جۇزەگە اسىرىلادى. بۇل ءوز كەزەگىندە تاجىريبە الماسۋعا جانە كاسىبي ماماندار دايارلاۋعا مۇمكىندىك بەرەدى.
ۇلتتىق كينو جاۋھارلارى
جاڭا پاۆيلون قازاقستاننىڭ كينو سالاسىن دامىتۋعا, الەمدىك دەڭگەيدەگى كونتەنت جاساۋعا جانە ينۆەستيتسيا تارتۋعا جول اشادى. سونداي-اق ەلىمىزدىڭ تۇكپىر-تۇكپىرىنەن تالانتتى جاستاردى تارتاتىن شىعارماشىلىق ورتالىق قالىپتاسادى.
كينوپاۆيلون زاماناۋي دەكوراتسيالار مەن جوعارى تەحنولوگيالىق مۇمكىندىكتەردى ۇسىنادى, بۇل – وتاندىق مامانداردىڭ حالىقارالىق ستۋديالارمەن تەڭ دارەجەدە جۇمىس ىستەۋىنە جاعداي جاسايدى.
الماتىدا داڭقتى كينوگەرلەرگە ارنالعان كورمە اشىلدى
دجەكي چاننىڭ پروديۋسەرى لي چيۋ ۆا بۇل جوبانىڭ جۇزەگە اسۋىنا قۋانىشتى ەكەنىن جەتكىزدى.
«جارتى جىل بۇرىن ءبىز وسى جوبانى تالقىلاعان ەدىك, ال بۇگىندە قۇرىلىس باستالىپ كەتتى. بۇل – ۇلكەن جەتىستىك. دجەكي چان بارشا قازاقستاندىقتارعا سالەم جولداپ, جوباعا تابىس تىلەيدى», دەدى ول.
جوبانىڭ جالپى اۋماعى – 15 گەكتار. عيمارات اۋدانى – 3 000 شارشى مەتر. قۇرىلىس 2026 جىلدىڭ تامىز ايىندا اياقتالادى دەپ جوسپارلانعان.«Dala Stage» جوباسى قازاقستاندا كرەاتيۆتى يندۋستريانى دامىتۋعا سەرپىن بەرەتىن ماڭىزدى ورتالىققا اينالماق. بۇل پاۆيلون ۇلتتىق قۇندىلىقتاردى دارىپتەپ قانا قويماي, ەلىمىزدىڭ حالىقارالىق دەڭگەيدەگى مادەني جانە ەكونوميكالىق بەدەلىن ارتتىرۋعا ىقپال ەتەدى.
ەلىمىزدە كينوجوبالاردى ىرىكتەۋ كونكۋرسى باستالدى