سۋ شارۋاشىلىعى ينفراقۇرىلىمىن جاڭعىرتۋ شەڭبەرىندە وڭتۇستىك وڭىرلەردە اۋقىمدى تسيفرلاندىرۋ جۇمىستارى قولعا الىندى. جالپى ۇزىندىعى 968 شاقىرىم بولاتىن, 65 مىڭ گەكتار جەردى سۋاراتىن 103 يرريگاتسيالىق كانالدى اۆتوماتتاندىرۋ باستالدى, دەپ جازادى Egemen.kz.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ ايتۋىنشا, بۇل جۇمىستار ەلدىڭ سۋ قاۋىپسىزدىگىن قامتاماسىز ەتۋدە ماڭىزدى ءرول اتقارادى.
«مينيسترلىك تسيفرلىق قۇرالداردى ۇشتاستىرا وتىرىپ, سۋ رەسۋرستارىن باسقارۋدىڭ كەشەندى, كوپدەڭگەيلى جۇيەسىن قالىپتاستىرىپ جاتىر. مۇنداي ءتاسىل ەكونوميكانىڭ ءتۇرلى سالالارىنىڭ تۇراقتى دامۋىن قامتاماسىز ەتۋگە, ەلدىڭ سۋ قاۋىپسىزدىگىن نىعايتۋعا جانە ومىرلىك ماڭىزى بار رەسۋرستى بولاشاق ۇرپاق ءۇشىن ساقتاۋعا مۇمكىندىك بەرەدى», دەدى مينيستر.
بۇگىندە مينيسترلىك ازىرلەگەن سۋ رەسۋرستارىنىڭ ۇلتتىق اقپاراتتىق جۇيەسى 22 مىڭ سۋ نىسانىن قامتىپ وتىر. ونىڭ ىشىندە 17 مىڭنان استام وزەن, 4 مىڭعا جۋىق كول جانە گيدروتەحنيكالىق نىسانداردىڭ 60%-ى تسيفرلىق جۇيەگە ەنگىزىلگەن. جىل سوڭىنا دەيىن 6 مىڭنان استام كانالدى تسيفرلاندىرۋ جانە گيدروتەحنيكالىق نىسانداردى قامتۋ دەڭگەيىن 100%-عا جەتكىزۋ جوسپارلانعان.
جەتى وڭىردە كانالداردى تازارتۋ جۇمىستارى باستالدى
سونىمەن قاتار ەلدە بىرىڭعاي سۋ بالانسى قالىپتاستىرىلماق. بۇل جۇيە سۋ شارۋاشىلىعى ۋچاسكەلەرى بولىنىسىندە ناقتى سۋ اعىنىن, سۋ قويمالارىنداعى جيناق كولەمىن جانە سۋدى تۇتىنۋ دەڭگەيىن ءوزارا سالىستىرۋعا مۇمكىندىك بەرەدى.
قاۋىپسىزدىك ماسەلەسى دە نازاردان تىس قالماعان. گيدروتەحنيكالىق قۇرىلىسجايلار مەن سۋ نىساندارىنىڭ جاي-كۇيى تۇراقتى باقىلاۋعا الىنىپ, عارىشتىق مونيتورينگ پەن گيدروبەكەتتەردىڭ دەرەكتەرى ينتەگراتسيالانىپ جاتىر. بۇل سۋ رەسۋرستارىن باسقارۋداعى اشىقتىقتى ارتتىرىپ, توتەنشە جاعدايلاردىڭ الدىن الۋعا جول اشادى.
كانالدارعا اۆتوماتتاندىرۋ جۇيەسى ورناتىلادى - مينيستر