الماتىدا قازاقستان دۇنگەندەرىنىڭ رەسپۋبليكالىق ەتنومادەني ورتالىعى تاۋەلسىزدىك قۇندىلىقتارىن ناسيحاتتاۋعا ارنالعان مەرەكەلىك ءىس-شارا ۇيىمداستىردى. وعان ەتنومادەني بىرلەستىكتەر وكىلدەرى, قوعام قايراتكەرلەرى, شىعارماشىلىق زيالى قاۋىم, قىرعىزستاننان كەلگەن قوناقتار مەن جاستار قاتىستى, دەپ جازادى Egemen.kz.
بۇگىندە ەلىمىزدە دۇنگەن ەتنوسىنىڭ سانى 86 مىڭنان اسادى. بۇل ەتنومادەني قوزعالىس 1989 جىلى الماتىدا العاشقى مادەني ورتالىقتىڭ اشىلۋىنان باستاۋ الىپ, كەيىن ەلىمىزدىڭ كوپتەگەن ءوڭىرىن قامتىعان كەڭ جەلىگە اينالدى. قازىرگى تاڭدا ورتالىقتىڭ فيليالدارى بىرقاتار وبلىستار مەن استانا قالاسىندا جۇمىس ىستەيدى. 2022 جىلى قۇرىلعان رەسپۋبليكالىق ۇيىم 11 وڭىرلىك بىرلەستىكتى بىرىكتىرىپ, مادەني-اعارتۋشىلىق جانە قايىرىمدىلىق باعىتتا قىزمەت اتقارىپ كەلەدى.
سالتاناتتى جيىندا ءسوز سويلەگەندەر دۇنگەن ەتنوسىنىڭ ەل دامۋىنا قوسىپ وتىرعان ۇلەسىن, مادەني مۇرانى ساقتاۋداعى ءرولىن جانە تاۋەلسىزدىك قۇندىلىقتارىن ىلگەرىلەتۋگە قوسقان ەڭبەگىن ەرەكشە اتاپ ءوتتى. سونداي-اق دۇنگەن وكىلدەرىنىڭ ءبىلىم, مادەنيەت, ونەر جانە سپورت سالالارىنداعى جەتىستىكتەرى دە ءسوز بولدى.
قحا توراعاسىنىڭ ورىنباسارى مارات ءازىلحانوۆ ورتالىقتىڭ باستى باعىتتارىنىڭ ءبىرى قايىرىمدىلىق ەكەنىن اتاپ ءوتتى. ونىڭ ايتۋىنشا, مەتسەناتتار الەۋمەتتىك وسال توپتاردى قولداپ, «مەكتەپكە جول» اكتسياسى اياسىندا تۇراقتى كومەك كورسەتىپ كەلەدى. سونىڭ ءبىر مىسالى – جامبىل وبلىسىندا 50 وتباسىعا كومەك كورسەتىلگەن قايىرىمدىلىق شاراسى.
ەتنومادەني بىرلەستىكتەر باسشىلارىمەن كەزدەستى
مەرەكەلىك كەشتىڭ كوركىن مازمۇندى كونتسەرتتىك باعدارلاما اشا ءتۇستى. ساحنادا كۋددۋس كۋجامياروۆ اتىنداعى ۇيعىر مۋزىكالىق كومەديا تەاترىنىڭ ارتىستەرى ونەر كورسەتىپ, اقىندار جىر وقىدى. اسىرەسە ۇرپاق ساباقتاستىعىن كورسەتكەن قويىلىمدار مەن پوەزيالىق تۋىندىلار كورەرمەنگە ەرەكشە اسەر قالدىردى.
مۋزىكالىق باعدارلامادا كلاسسيكالىق جانە ۇلتتىق اۋەندەر توعىستى. قوناقتار ابايدىڭ «كوزىمنىڭ قاراسى» شىعارماسىن تىڭداپ, حالىقارالىق دەڭگەيدەگى انشىلەردىڭ ونەرىن تاماشالادى. قىرعىزستاننان كەلگەن ونەرپازدار دا كەشتىڭ مازمۇنىن بايىتىپ, ءوز ونەرلەرىن ۇسىندى.
سونىمەن قاتار, ساحنادا بي قويىلىمدارى مەن ءسان كورسەتىلىمى دە ءوتتى. ديزاينەر شينحۋ رابي ۇسىنعان ۇلتتىق توپتاما ءداستۇر مەن زاماناۋي ءستيلدىڭ ۇيلەسىمىن كورسەتتى.
كەشتىڭ شارىقتاۋ ءساتى «اتامەكەن» انىمەن اياقتالدى. «اسىل قازىنا» بالالار حورىنىڭ ورىنداۋىنداعى بۇل تۋىندى بىرلىك, دوستىق جانە وتانعا دەگەن سۇيىسپەنشىلىك يدەياسىن ايشىقتادى.
ەتنومادەني بىرلەستىكتەر دە ءۇن قوستى
ءىس-شارانىڭ جوعارى دەڭگەيدە وتۋىنە ۇيىمداستىرۋشىلار مەن بىرلەستىك بەلسەندىلەرى اتسالىستى. جالپى العاندا, بۇل مەرەكە دۇنگەن ەتنومادەني بىرلەستىگىنىڭ ەلدەگى قوعامدىق كەلىسىمدى نىعايتۋعا, مادەني ارتۇرلىلىكتى ساقتاۋعا جانە تاۋەلسىزدىك قۇندىلىقتارىن دارىپتەۋگە قوسىپ وتىرعان ۇلەسىن ايقىن كورسەتتى.