الماتى تۇرعىندارى «باعاناشىل» بالالار ءۇيى اۋماعىندا ورنالاسقان عيماراتتاردىڭ ءبىرىنىڭ بۇزىلعانىن, ال ەكىنشىسىنىڭ تەرەزەسىز قالعانىن بايقاپ, ۆيدەوعا ءتۇسىرىپ العان. قالا اكىمدىگى جاعدايعا قاتىستى تۇسىنىكتەمە بەردى, دەپ حابارلايدى Egemen.kz.
الماتى قالاسىنىڭ ءبىلىم باسقارماسىنىڭ مالىمەتىنشە, 2025 جىلعى 13 قازاندا قالا قۇرىلىس باسقارماسى مەن Integra Construction جشس اراسىندا جاڭا نىساندى جوبالاۋ بويىنشا ىنتىماقتاستىق مەموراندۋمى جاسالعان. تەحنيكالىق تەكسەرۋ ناتيجەسىندە اكىمشىلىك, وقۋ كورپۋستارى, سپورت جانە اكت زالدارى سەيسميكالىق تۇرعىدان جارامسىز دەپ تانىلىپ, بۇزۋعا شەشىم قابىلدانعان. قازىرگى تاڭدا دەمونتاج جۇمىستارى تولىق اياقتالعان.
جوبا اياسىندا جاتاقحانا كورپۋسىن قايتا جاڭارتۋ, سونداي-اق جاڭا وقۋ, سپورت, اكىمشىلىك عيماراتتار مەن اسحانا سالۋ جوسپارلانعان. قۇرىلىس جۇمىستارىن وسى جىلدىڭ ءتورتىنشى توقسانىندا اياقتاۋ كوزدەلگەن.
اكىمدىكتىڭ مالىمەتىنە سايكەس, بالالار الماتىدا قالعان. ولار 2024 جىلدىڭ تامىز ايىندا-اق ارنايى الەۋمەتتىك قىزمەتتەرگە مۇقتاج بالالاردى قولداۋ ورتالىعىنا كوشىرىلگەن جانە سول جەردە تۇرىپ جاتىر.
ايتا كەتەيىك, «باعاناشىل» بالالار ۇيىنە قاتىستى داۋ 2025 جىلدىڭ كوكتەمىنەن بەرى جالعاسىپ كەلەدى. الدىمەن بالالاردى الماتىدان قوناەۆقا كوشىرۋ جوسپارلانعانى قوعامدا رەزونانس تۋدىردى. كەيىن بۇل شەشىمگە قارسى پىكىرلەر ايتىلىپ, ءتۇرلى تەكسەرۋلەر جۇرگىزىلدى.
سوڭىندا جاعدايعا پرەزيدەنت قاسىم-جومارت توقاەۆ ارالاسىپ, بالالاردى كوشىرۋ توقتاتىلدى جانە قىزمەتتىك تەكسەرۋ تاعايىندالدى. وسى وقيعادان كەيىن بىرقاتار لاۋازىمدى تۇلعالار جاۋاپكەرشىلىككە تارتىلىپ, كەيبىرى قىزمەتىنەن بوساتىلدى.