قوستاناي. 26 اقپان. «نۇر وتان» پارتياسى قوستاناي وبلىستىق فيليالىنىڭ كەزەكتەن تىس كونفەرەنتسياسىندا جەڭىستىڭ 70 جىلدىعىنا دايىندىق جانە ونى وتكىزۋ ماسەلەسى قارالدى. بۇل تۋرالى egemen.kz ءتىلشىسى حابارلادى.
كونفەرەنتسيادا «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى ءاليا ساپاروۆا جەڭىستىڭ 70 جىلدىعىنا پارتيا فيليالى جۇرگىزىپ وتىرعان دايىندىق جۇمىستارىنا شولۋ جاسادى. وبلىستا قازىر 357 ۇلى وتان سوعىسىنىڭ ارداگەرى تۇرىپ جاتىر. وبلىس وڭىرىندەگى ۇكىمەتتىك ەمەس ۇيىمدار, جاستار «ارداگەرلەردى ارداقتايىق!» رەسپۋبليكالىق جوباسىنىڭ جاقسى ارىپتەسىنە اينالدى. اسكەري-پاتريوتتىق كلۋبتار, جاستار ۇيىمدارى ىزدەستىرۋ جۇمىستارىنا بەلسەنە قاتىسىپ وتىر.
«نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى ءاليا ساپاروۆا: «جاقسى مىسال وتە كوپ. مىسالى, قوستاناي اۋدانى, ۆلاديميروۆ سەلوسىنداعى «وليمپ» اسكەري-پاتريوتتىق كلۋبى ۇلى وتان سوعىسىندا حابارلسىز كەتكەن 126 جاۋىنگەردىڭ ەسىمىن انىقتاپ وتىر. بۇگىندە ولاردىڭ 20-سىنىڭ قايدا جەرلەنگەنى انىقتالدى» دەدى. سونداي-اق, ايماقتىق «كوستانايسكي نوۆوستي» گازەتىندە «قايتا ورالعان ەسىمدەر» ايدارى ەكى جىلدان بەرى ۇزبەي تانىمدىق ماتەريالدار بەرىلىپ كەلەدى. ول ارقىلى تالايلار حابارسىز كەتكەن اتالارىن تاپتى.
جاستار باستاماسىمەن وتكەن جىلى 3 مىڭ زەينەتكەردىڭ ۇيىنە بارىپ, كومەك بەرىلدى.
وبلىستىق فيليالدىڭ باستاماسىمەن قولعا الىنعان «مەنىڭ اتامنىڭ پورترەتى» اكتسياسى شەڭبەرىندە 1 300 ارداگەردىڭ سۋرەتى جينالدى. بۇل اكتسياعا پارتيانىڭ اۋداندىق, قالالىق فيليالدارى دا بەنلسەندى اتسالىسۋدا.
كونفەرەنتسيادا جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرلان جاۋلىباەۆ سوعىس ارداگەرلەرى مەن مۇگەدەكتەرىنە جاسالىپ وتىرعان مەملەكەتتىك كومەك جونىندە ايتىپ بەردى. وبلىس اكىمى, «نۇر وتان» پارتياسى وبلىستىق فيليالىنىڭ توراعاسى نۇرالى سادۋاقاسوۆ سوعىس ارداگەرلەرىنىڭ بارلىعىنا تەك مەرەكە قارساڭىندا عانا ەمەس, بارلىق ۋاقىتتا قامقورلىق جاسالۋى ءتيىس ەكەنىن ايتتى. سونىمەن قاتار, وبلىستىڭ بارلىق وڭىرىندە ەسكەرتكىشتەر مەن ساياباقتاردىڭ مەرەكەگە دەيىن تەگىس جوندەلىپ, جاڭعىرتىلىپ بولۋىن تاپسىردى.
ءنازيرا جارىمبەتوۆا.
دەرەك, سۋرەت: egemen.kz.