حالقىمىزدىڭ باستى مەيرامى – ناۋرىز قارساڭىندا ەلوردادا 200-دەن استام ءىس-شارا ۇيىمداستىرىلىپ جاتىر. ناۋرىزناما ونكۇندىگىنىڭ اياسىنداعى ءار كۇن بەلگىلى ءبىر تاقىرىپقا ارنالىپ, ۇلتتىق قۇندىلىقتاردى دارىپتەۋگە باعىتتالعان. بۇگىن, 17 ناۋرىز – شاڭىراق كۇنى, دەپ جازادى Egemen.kz.
بيىلعى مەرەكەنىڭ باستى ەرەكشەلىگى – تسيفرلىق تەحنولوگيالار مەن جاساندى ينتەللەكت مۇمكىندىكتەرىنىڭ كەڭىنەن قولدانىلۋى. مەملەكەت باسشىسى جاريالاعان تسيفرلاندىرۋ جانە جاساندى ينتەللەكت جىلى اياسىندا ەلوردادا ينتەراكتيۆتى الاڭدار قۇرىلىپ, قالا تۇرعىندارى مەن قوناقتارىنا روبوتتار مەن زاماناۋي تەحنولوگيالاردىڭ كورسەتىلىمدەرى ۇسىنىلادى. بۇل باستاما ۇلتتىق ءداستۇر مەن جاڭا تەحنولوگيانىڭ ساباقتاستىعىن ايقىن كورسەتۋدى كوزدەيدى.
شاڭىراق كۇنى اياسىندا مادەني جانە سپورتتىق ءىس-شارالار دا استانا قالاسىندا كەڭىنەن ۇيىمداستىرىلىپ وتىر. ماسەلەن, مۋزىكالىق جاس كورەرمەن تەاترى «باقىتتى شاڭىراق جىرى» اتتى كەش وتكىزىپ, وتباسىلىق جۇپتاردىڭ ونەرىن كوپشىلىككە ۇسىنادى. ج. ۇشكەمپىروۆ اتىنداعى جەكپە-جەك سارايىندا مەكتەپ وقۋشىلارى اراسىندا اۋقىمدى فلەشموب پەن «التىن اسىق» ۇلتتىق ويىنى وتەدى.
ۇلىس پەن ىرىستىڭ نەگىزى
جوعارى وقۋ ورىندارى دا مەرەكەلىك باعدارلاماعا بەلسەندى قاتىسىپ جاتىر. س. سەيفۋللين اتىنداعى اگروتەحنيكالىق ۋنيۆەرسيتەت «شاڭىراق قۇرۋ – ءداستۇر جالعاسى» ءراسىمىن كورسەتسە, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى جاس وتباسىلار اراسىندا «وتباسى – باقىت مەكەنى» ۇلتتىق سپورت ەستافەتاسىن ۇيىمداستىرادى. ال ءال-فارابي اتىنداعى وقۋشىلار سارايىندا «اق باتا» بايقاۋى وتەدى.
كۇن مەن ءتۇن 22 ناۋرىزدا تەڭەلمەيدى
مەرەكەلىك كۇننىڭ مازمۇنى وتباسى قۇندىلىعىن دارىپتەۋگە باعىتتالعان. كوپبالالى انالارعا «كۇمىس القا» جانە «التىن القا» توسبەلگىلەرى تابىستالادى. سونىمەن قاتار جاڭا تۋعان سابيلەرگە ۇلتتىق ۇلگىدەگى بەسىكتەر سىيعا تارتىلىپ, وتباسىلىق ءومىرىنىڭ 50 جىلدىعىن اتاپ وتكەن جۇپتارعا قۇرمەت كورسەتىلەدى. «شاڭىراق – وتباسىنىڭ بەرەكەسى» چەللەندجى دە وسى كۇننىڭ نەگىزگى باستامالارىنىڭ ءبىرى رەتىندە جوسپارلانعان.
ناۋرىزناما ناقىشى
وسىلايشا, شاڭىراق كۇنى ەلوردادا ءداستۇر مەن جاڭاشىلدىقتى ۇشتاستىرا وتىرىپ, وتباسى ينستيتۋتىنىڭ قوعامداعى ماڭىزىن ايشىقتايتىن مازمۇندى مەرەكەگە اينالىپ وتىر.