مەملەكەت باسشىسى نۇرسۇلتان نازارباەۆ فرانتسيا پرەزيدەنتى فرانسۋا وللاندپەن تەلەفون ارقىلى سويلەستى, دەپ حابارلادى پرەزيدەنتتىڭ ءباسپاسوز قىزمەتى.
قازاقستان مەن فرانتسيا باسشىلارى ۋكراينانىڭ وڭتۇستىك-شىعىسىنداعى احۋالعا قاتىستى 12 اقپانداعى مينسك كەلىسىمىن جۇزەگە اسىرۋ جونىندەگى كەشەندى شارالاردى اتقارۋ اياسىندا پىكىر الماستى.
ەكى ەل پرەزيدەنتتەرى مينسك كەلىسىمى قازىردىڭ وزىندە قانتوگىستى توقتاتۋعا ىقپال ەتكەنىنە نازار اۋداردى. قاقتىعىس اۋماعىنان اۋىر تەحنيكانى اكەتۋدىڭ ماڭىزدىلىعى اتاپ ءوتىلدى.
نۇرسۇلتان نازارباەۆ رەسەي مەن ەۋروپالىق وداق اراسىنداعى سانكتسيالاردى بىرتىندەپ الۋ ءۇشىن قاجەتتى شارتتارعا كوڭىل اۋداردى. ف.وللاند وق اتۋ تولىق توقتاتىلىپ, اۋىر تەحنيكا اكەتىلىپ, ماريۋپول توڭىرەگىندەگى قاقتىعىس باسىلعان جاعدايدا سانكتسيالاردى ازايتۋ ماسەلەسى تالقىلانۋى مۇمكىندىگىن ايتتى.
ەكى ەل كوشباسشىلارى ۋكرايناداعى داعدارىستى رەتتەۋ ماسەلەسى بويىنشا حالىقارالىق سەرىكتەستەرمەن ءوزارا ءىس-قيمىلدى جالعاستىرۋعا دايىن ەكەنىن ءبىلدىردى.
سونداي-اق, اڭگىمە بارىسىندا قازاقستان-فرانتسيا ستراتەگيالىق سەرىكتەستىگىنىڭ كەلەشەگى تالقىلاندى. نۇرسۇلتان نازارباەۆ ف.وللاندقا فرانتسياعا بيىل ساپارمەن كەلۋگە شاقىرعانى ءۇشىن العىس ايتتى.
تەلەفون ارقىلى سويلەسۋگە فرانتسۋز جاعى باستاماشىلىق ەتتى.