15 ناۋرىز كۇنى الماتى وبلىسىندا تۇنگى ساعات 00:00 مەن كۇندىزگى 12:00 ارالىعىندا 24 ءسابي دۇنيەگە كەلدى. ونىڭ ىشىندە 13 ۇل جانە 11 قىز بالا بار, دەپ حابارلايدى Egemen.kz.
جالپى, الماتى وبلىسى – رەسپۋبليكا بويىنشا تۋ كورسەتكىشى جوعارى وڭىرلەردىڭ ءبىرى. وڭىردە جىل سايىن دۇنيەگە كەلەتىن سابيلەر سانى بويىنشا الدىڭعى قاتاردان كورىنىپ كەلەدى. بيىلعى جىلدىڭ العاشقى ەكى ايىندا وبلىستا 2968 بالا ومىرگە كەلگەن.
الماتى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى لەيلا سەرىكباەۆانىڭ ايتۋىنشا, وڭىردە انا مەن بالا دەنساۋلىعىن قورعاۋ باعىتىندا جۇيەلى جۇمىستار جۇرگىزىلىپ جاتىر.
«الماتى وبلىسىندا تۋ كورسەتكىشى تۇراقتى تۇردە جوعارى دەڭگەيدە ساقتالىپ وتىر. ءبىزدىڭ وڭىردە رەسپۋبليكا بويىنشا ەڭ كوپ بالا دۇنيەگە كەلەتىن ايماقتاردىڭ ءبىرى. انا مەن بالا دەنساۋلىعىن قورعاۋ, قاۋىپسىز بوساندىرۋ جانە مەديتسينالىق كومەكتىڭ قولجەتىمدىلىگىن ارتتىرۋ – دەنساۋلىق ساقتاۋ سالاسىنىڭ باستى باسىمدىقتارىنىڭ ءبىرى. وسى باعىتتاعى جۇمىستاردىڭ ناتيجەسىندە جاڭا تۋعان سابيلەر سانى جىلدان جىلعا ءوسىپ كەلەدى», دەدى لەيلا سەرىكباەۆا.
ايتا كەتەيىك, 2025 جىلى الماتى وبلىسىندا بارلىعى 27 131 ءسابي دۇنيەگە كەلگەن.
رەفەرەندۋم كۇنى اتىراۋدا ەكى بىردەي ۇشەم دۇنيەگە كەلدى