الماتى قالاسىنداعى قوعامدىق كوممۋنيكاتسيالار ورتالىعىندا تاۋەلسىز بايقاۋشىلاردىڭ اقپاراتتىق شتابى مەن التى ۇكىمەتتىك ەمەس ۇيىمدى بىرىكتىرگەن تاۋەلسىز بايقاۋشىلار كواليتسياسىنىڭ العاشقى بريفينگى ءوتتى. كەزدەسۋ بارىسىندا رەسپۋبليكالىق رەفەرەندۋمنىڭ ءوتۋ بارىسى, سونداي-اق ەلىمىزدىڭ وڭىرلەرىندەگى بايقاۋشىلاردىڭ جۇمىسى تۋرالى جەدەل اقپارات ۇسىنىلدى, دەپ حابارلايدى Egemen.kz.
بريفينگ بارىسىندا رەفەرەندۋم كۇنى اقپاراتتىق اشىقتىقتى قامتاماسىز ەتۋ ماقساتىندا ۇيىمداستىرىلعان شتابتىڭ جۇمىسى تانىستىرىلدى. شتابتىڭ تىكەلەي ەفيرى تاڭعى ساعات 07:00-دە باستالىپ, داۋىس بەرۋ اياقتالىپ, الدىن الا قورىتىندىلار جاريالانعانعا دەيىن كۇنى بويى جالعاساتىنى اتاپ ءوتىلدى. ترانسلياتسيا Independ.kz اقپارات اگەنتتىگىنىڭ YouTube ارناسىندا, سونداي-اق قوعامدىق كوممۋنيكاتسيالار ورتالىعىنىڭ رەسمي الەۋمەتتىك جەلىدەگى پاراقشالارىندا جۇرگىزىلىپ جاتىر.
اقپاراتتىق شتابتىڭ جۇمىسى تۋرالى بايانداعان رافاەل گاسانوۆتىڭ ايتۋىنشا, رەفەرەندۋم بارىسىن باقىلاۋ ماقساتىندا وڭىرلەرمەن تۇراقتى بايلانىس ورناتىلعان. داۋىس بەرۋ ۋچاسكەلەرى اشىلعان ساتتەن باستاپ تىكەلەي قوسىلىمدارعا الماتى جانە شىمكەنت قالالارى, سونداي-اق جەتىسۋ, سولتۇستىك قازاقستان جانە باتىس قازاقستان وبلىستارى (ورال قالاسى) قوسىلعان. كۇن بارىسىندا وزگە وڭىرلەرمەن دە بايلانىس ورناتۋ جوسپارلانىپ وتىرعانى ايتىلدى.
ماڭعىستاۋ وبلىسىندا 261 رەفەرەندۋم ۋچاسكەسى اشىلدى
ونىڭ سوزىنشە, رەفەرەندۋم بارىسى تۋرالى اقپارات وڭىرلىك ۇيلەستىرۋشىلەر ارقىلى بايقاۋشىلاردان تۇراقتى تۇردە قابىلدانىپ وتىرادى. بارلىق مالىمەتتەر رەسمي دەرەككوزدەر نەگىزىندە مونيتورينگتەن وتكىزىلىپ, تەكسەرىلگەننەن كەيىن شتابتىڭ اقپاراتتىق الاڭدارىندا جەدەل تۇردە جاريالانادى. بۇل ءتاسىل قوعامعا شىنايى ءارى تەكسەرىلگەن اقپارات ۇسىنۋعا مۇمكىندىك بەرەدى.
«اقپاراتتىق شتابتىڭ نەگىزگى مىندەتى – رەفەرەندۋم بارىسى تۋرالى قوعامدى جەدەل ءارى ناقتى اقپاراتپەن قامتاماسىز ەتۋ, سونداي-اق مۇمكىن بولاتىن اقپاراتتىق ارانداتۋلار مەن جالعان حابارلامالاردىڭ تارالۋىنا جول بەرمەۋ», دەدى رافاەل گاسانوۆ.
بريفينگتە ايتىلعان مالىمەتكە سايكەس, ساعات 10:00-دەگى جاعداي بويىنشا تاۋەلسىز بايقاۋشىلاردىڭ اقپاراتتىق شتابىنا زاڭبۇزۋشىلىقتار, اقپاراتتىق ارانداتۋلار نەمەسە جالعان اقپاراتتىڭ تارالۋ فاكتىلەرى تۋرالى مالىمەت تۇسپەگەن.
سونىمەن قاتار وڭىرلىك ۇيلەستىرۋشىلەر مەن بايقاۋشىلاردىڭ اقپاراتىنا سۇيەنسەك, ەلىمىزدىڭ ءتۇرلى ايماقتارىنداعى داۋىس بەرۋ ۋچاسكەلەرىندە ازاماتتاردىڭ بەلسەندىلىگى جوعارى.
بايقاۋشىلار رەفەرەندۋمعا قاتىسۋشىلاردىڭ داۋىس بەرۋ قۇقىعىن جۇزەگە اسىرۋ ءۇشىن ۋچاسكەلەرگە تۇراقتى تۇردە كەلىپ جاتقانىن تىركەپ وتىر. بۇل ءوز كەزەگىندە قوعامنىڭ ساياسي بەلسەندىلىگى مەن ازاماتتىق جاۋاپكەرشىلىگىنىڭ ارتىپ كەلە جاتقانىن كورسەتەدى.
ءىىم: رەفەرەندۋم كەزىندە ەلدەگى جاعداي پوليتسيانىڭ تولىق باقىلاۋىنا الىنعان
ايتا كەتۋ كەرەك, تاۋەلسىز بايقاۋشىلار كواليتسياسى رەفەرەندۋم بارىسىنىڭ اشىقتىعى مەن زاڭدىلىعىن قامتاماسىز ەتۋ ماقساتىندا ەلىمىزدىڭ ءارتۇرلى وڭىرلەرىندە باقىلاۋ جۇرگىزىلىپ جاتىر. اقپاراتتىق شتاب وسى پروتسەستەگى نەگىزگى ۇيلەستىرۋ الاڭى رەتىندە جۇمىس ىستەپ, قوعامدى جەدەل ءارى وبەكتيۆتى اقپاراتپەن قامتاماسىز ەتۋدى كوزدەيدى.
رەفەرەندۋم بارىسىنداعى جاڭارتىلعان اقپاراتتار مەن تىكەلەي ەفيردى Independ.kz اقپارات اگەنتتىگىنىڭ YouTube ارناسىنان, سونداي-اق قوعامدىق كوممۋنيكاتسيالار ورتالىعىنىڭ الەۋمەتتىك جەلىلەردەگى رەسمي پاراقشالارىنان كورۋگە بولادى.