بۇگىن تاڭەرتەڭ الماتىلىقتار قالانىڭ قازاقستاننىڭ مادەني استاناسى ەكەندىگىن تاعى ءبىر مارتە كورسەتتى. رەفەرەندۋم كۇنى ناۋرىزباي اۋدانىنا قاراستى شۇعىلا شاعىن اۋدانىنداعى №562 سايلاۋ ۋچاسكەسىندە تۇرعىنداردى ەرەكشە قارسى الدى, دەپ حابارلايدى Egemen.kz.
№200 مەكتەپ عيماراتىندا ورنالاسقان ۋچاسكەدە سايلاۋشىلاردى ۇلتتىق ناقىشتاعى كيىم كيگەن «اجەلەر حورى» قارسى الدى. ءانشى اجەلەر العاشقى مينۋتتان-اق مەرەكەلىك كوڭىل كۇي سىيلاپ, حالىق اندەرىن ورىندادى. سونىمەن قاتار كەلگەن تۇرعىنداردى قۋانىش پەن بەرەكەنىڭ, اق تىلەكتىڭ بەلگىسى سانالاتىن ءداستۇرلى شاشۋ راسىمىمەن قارسى الدى.
الماتىدا سايلاۋشىلارعا فوتوايماق ۇيىمداستىرىلدى
شاشىلعان ءتاتتى دامدەر مەن جينالعان جۇرتتىڭ شات كۇلكىسى اينالانى ەرەكشە مەرەكەلىك كوڭىل كۇيگە بولەدى. شاعىن اۋدان تۇرعىندارىنىڭ كوپشىلىگى داۋىس بەرۋ كۇنىنىڭ وسىنداي جىلى ءارى اسەرلى باستالارىن كۇتپەگەنىن ايتتى. كوپشىلىك حور مۇشەلەرىمەن بىرگە سۋرەتكە ءتۇسىپ, مەرەكەلىك كوڭىل كۇي سىيلاعاندارى ءۇشىن العىس ءبىلدىردى. ولاردىڭ ايتۋىنشا, مۇنداي باستامالار ماڭىزدى قوعامدىق شارالاردى حالىققا جاقىنداتىپ, شىنايى مەرەكەلىك اتموسفەرا قالىپتاستىرادى.
استانادا رەفەرەندۋم ۋچاسكەسىنە روبوت-يتپەن كەلگەن قىز جۇرت نازارىن اۋداردى
ۇيىمداستىرۋشىلاردىڭ ايتۋىنشا, شارانىڭ باستى ماقساتى – تۇرعىندارعا كوتەرىڭكى كوڭىل كۇي سىيلاۋ عانا ەمەس, سونىمەن قاتار قازاق حالقىنىڭ باي داستۇرلەرىن ناسيحاتتاۋ. وسىنداي ماڭىزدى مەملەكەتتىك وقيعا – رەفەرەندۋم كۇنى الماتىلىقتار ۇلتتىق قۇندىلىقتاردى قادىرلەي وتىرىپ, قوناقجايلىق ءداستۇرىن دە ايقىن كورسەتتى.