اتىراۋ وبلىسىنىڭ اۋماقتىق رەفەرەندۋم كوميسسياسىنىڭ توراعاسى ءاسيا قىستاۋباەۆا وڭىردەگى داۋىس بەرۋ بارىسى تۋرالى باياندادى. ونىڭ ايتۋىنشا, رەفەرەندۋمدى وتكىزۋگە 285 كوميسسيا قاتىسىپ وتىر, ولاردىڭ قۇرامىندا 2 091 ادام بار. ونىڭ ىشىندە 9 كوميسسيا – اۋماقتىق, 276-سى – ۋچاسكەلىك كوميسسيالار, دەپ حابارلايدى Egemen.kz.
«رەفەرەندۋمنىڭ بارلىق 276 ۋچاسكەسى اشىلدى. قولدانىستاعى زاڭناماعا سايكەس ۋچاسكەلىك رەفەرەندۋم كوميسسيالارى تاڭعى ساعات 6:00-دە ءوز جۇمىسىنا كىرىستى, دەدى اتىراۋ وبلىسىنىڭ اۋماقتىق رەفەرەندۋم كوميسسياسىنىڭ توراعاسى.
جالپى, داۋىس بەرۋ تاڭعى ساعات 7:00-دە باستالدى. اتىراۋ وبلىسىنىڭ اۋماقتىق رەفەرەندۋم كوميسسياسىنىڭ شەشىمىمەن اسكەري بولىمدە قۇرىلعان №75 ۋچاسكەدە داۋىس بەرۋ تاڭعى ساعات 6:00-دە باستالدى.
بۇگىن ەلوردادا «رەفەرەندۋم-2026» ونلاين مارافونى وتەدى
وبلىس بويىنشا رەفەرەندۋمعا قاتىسۋ قۇقىعى بار ازاماتتاردىڭ تىزىمىنە 416 619 ادام ەنگىزىلگەن, ولاردىڭ 4 699 مۇگەدەكتىگى بار تۇرعىندار.
«داۋىس بەرۋ ورىندارىندا مۇگەدەكتىگى بار ادامدار ءۇشىن بارلىق جاعداي جاسالعان. بۇگىن قاجەتتىلىككە قاراي 137 ينۆاتاكسي قىزمەت كورسەتەدى, 27 سۋردواۋدارماشى جۇمىس ىستەيدى. بارلىق ۋچاسكەلەر ارنايى بۇرىشتارمەن جانە داۋىس بەرۋگە ارنالعان كابينالارمەن جابدىقتالعان. ۋچاسكەلەردە جاڭا كونستيتۋتسيا جوباسىنىڭ ءماتىنى جازىلعان پلاكاتتار, ءماتىننىڭ مەملەكەتتىك جانە ورىس تىلدەرىندەگى اۋديونۇسقالارى ورنالاستىرىلعان. سونىمەن قاتار, برايل قارپىمەن جازىلعان بيۋللەتەن ترافارەتى, قوسىمشا جارىق شامى, قۇلاققاپ, ۇلكەيتكىش اينەك, بيۋللەتەندى تولتىرۋ بويىنشا اۋديونۇسقاۋلىق بار. بۇگىن جاس سايلاۋشىلار كلۋبتارىنىڭ مۇشەلەرى ەرىكتىلەرمەن بىرگە قارت ادامدار مەن مۇگەدەكتىگى بار ازاماتتارعا كومەك كورسەتىپ, ولاردى داۋىس بەرۋ ورىندارىنا دەيىن الىپ بارادى», دەدى ءا.قىستاۋباەۆا.
قازاقستاندا جاڭا كونستيتۋتسيا جوباسى بويىنشا داۋىس بەرۋ باستالدى
اتىراۋ وبلىسىندا داۋىس بەرۋ بارىسىن باقىلاۋ ءۇشىن 17 قوعامدىق بىرلەستىك پەن ۇكىمەتتىك ەمەس ۇيىم, ال رەسپۋبليكالىق دەڭگەيدە 11 ۇيىم اككرەديتتەلگەن. داۋىس بەرۋ باستالعان ساتتە ۋچاسكەلەردە 285 باقىلاۋشى ءوز جۇمىسىنا كىرىستى.
«بۇگىن وبلىس بويىنشا 210 رەفەرەندۋم ۋچاسكەسىندە ازاماتتاردى ىزدەستىرۋگە ارنالعان سەرۆيستىك قىزمەتتەردىڭ جۇمىسى ۇيىمداستىرىلعان. ونىڭ 121-ءى اتىراۋ قالاسىندا ورنالاسقان. ەگەر ازامات ۋچاسكەدەگى تىزىمنەن تابىلماسا, سەرۆيستىك قىزمەت ارقىلى ارنايى دايىندىقتان وتكەن كوميسسيا مۇشەلەرى ونىڭ قاي ۋچاسكەدە تىركەلگەنىن انىقتاۋعا كومەكتەسەدى», دەدى ءا.قىستاۋباەۆا.
داۋىس بەرۋ كۇنىنە دەيىن وبلىس بويىنشا ازاماتتاردىڭ تۇرعىلىقتى مەكەنجايلارىنا داۋىس بەرۋ كۇنى, ۋاقىتى مەن ورنى كورسەتىلگەن 400 مىڭنان استام جەكە شاقىرۋ حاتتارى جەتكىزىلدى. ەكىنشى دەڭگەيلى بانكتەر PUSH-حابارلامالار جىبەرسە, بايلانىس وپەراتورلارى SMS شاقىرۋ جولدادى.
الماتىدا سايلاۋشىلارعا فوتوايماق ۇيىمداستىرىلدى
جالپى بارلىق ۋچاسكەلەردەگى داۋىس بەرۋ ورىندارىندا سايلاۋشىلارعا, باقىلاۋشىلارعا جانە بۇقارالىق اقپارات قۇرالدارىنىڭ وكىلدەرىنە قاجەتتى جاعداي جاسالعان. داۋىس بەرۋ جالعاسىپ جاتىر.