قىستان قالعان قاسات قارمەن قاتار كوڭىلدىڭ دە توڭى ءجىبىپ, جەر بۋساناتىن تۇستا ايرىقشا كۇتەتىن ۇلىق مەرەكەنىڭ باسى كورىسۋ كۇنىنەن باستالادى. امال مەرەكەسىن حالقىمىز ىقىلىم زاماننان بەرى داستۇرگە اينالدىرىپ, قاستەرلەپ كەلەدى. بۇگىنگى تاڭدا دا اتالعان كۇندى اسىعا كۇتىپ, تاڭ اتىسىمەن ءبىر-بىرىمەن قۇشاقتاسىپ كورىسۋگە, اماندىق سۇراسىپ, كوكتەمگە قۋانۋعا اسىعادى.
ەسكە سالايىق, 2024 جىلى مەملەكەت باسشىسى قاسىم-جومارت توقاەۆتىڭ باستاماسىمەن «ناۋرىزناما» ونكۇندىگى اياسىندا ناۋرىز مەيرامى جاڭا فورماتتا تويلانا باستادى. سول جىلدىڭ ناۋرىز ايىندا مادەنيەت جانە اقپارات مينيسترلىگى ارنايى قاۋلى قابىلداپ, 14-23 ناۋرىز ارالىعىن «ناۋرىزناما» ونكۇندىگى دەپ جاريالادى. ونكۇندىكتىڭ العاشقى كۇنى رەتىندە 14 ناۋرىز – كورىسۋ كۇنى بولىپ بەكىتىلگەن ەدى.
وسىعان وراي ۇلتتىق مۋزەيدە ناۋرىزناما ونكۇندىگى شەڭبەرىندە «امال مەرەكەسى – ىزگىلىك پەن بىرلىكتىڭ بەلگىسى» اتتى مادەني-تانىمدىق ءىس-شارا ءوتتى.
مەرەكەلى جيىندا ۇلتىمىزدىڭ رۋحاني مۇراسىندا ەرەكشە ورىن الاتىن كورىسۋ كۇنى – امال مەرەكەسىنىڭ تاريحي-مادەني ماڭىزى كەڭىنەن تانىستىرىلىپ, ۇلتتىق قۇندىلىقتار دارىپتەلدى, قوعامداعى ىزگىلىك پەن بىرلىك ۇستانىمدارى ناسيحات-تالدى.
ۇلتتىق مۋزەي ديرەكتورى بەرىك ابدىعالي ۇلى ۇلىق مەرەكەنىڭ رۋحاني ءمان-ماڭىزىنا توقتالىپ, جينالعان قاۋىمدى قۇتتىقتادى.
«ساناۋلى كۇندەردەن كەيىن كەلەتىن ءاز ناۋرىزدا تاريح قويناۋىنا تاعى ءبىر جىلىمىز جول تارتىپ, جاڭا كۇن تابالدىرىقتان اتتايدى. كوكتىڭ تىنىسىن تىڭداپ, جەردىڭ تامىرىن باسقان, تۇرمىس-تىرشىلىگىن تابيعات انامەن تىعىز بايلانىس-تىرعان حالقىمىز ناۋرىزدى جاڭارۋ مەن جاسامپازدىقتىڭ باستاۋى, ىرىc پەن بەرەكەنىڭ ارقاۋى دەپ باعالاعان. ال وسى ۇلىق مەرەكەنىڭ باستاۋى سانالاتىن امال كۇنى – ادامداردىڭ ءبىر-بىرىمەن كورىسىپ, وتكەنگە سالاۋات ايتىپ, جاڭا جىلدى اق نيەتپەن قارسى الاتىن تاعىلىمى تەرەڭ ءداستۇر. امال – تاتۋلىق پەن باۋىرمالدىقتى بەكەمدەپ, اعايىن اراسىن جاقىنداستىراتىن, ىزگىلىك پەن سىيلاستىقتى دارىپتەيتىن ەرەكشە كۇن», دەدى ول.
ءيا, امال مەرەكەسى – ادامداردىڭ ءبىر-بىرىمەن كورىسىپ, اماندىق سۇراسۋ ارقىلى تاتۋلىقتى, باۋىرمالدىقتى جانە ءوزارا قۇرمەتتى نىعايتاتىن ەجەلگى داستۇرلەردىڭ ءبىرى. بۇل كۇن ۇرپاقتار ساباقتاستىعىن جالعاپ, ۇلتتىق بىرەگەيلىكتى ساقتاۋعا قىزمەت ەتەتىن ماڭىزدى رۋحاني قۇندىلىق رەتىندە ەرەكشەلەنەدى.
ءىس-شارا تانىمدىق كەزدەسۋ, ءداستۇرلى راسىمدەر تانىستىرىلىمى جانە ينتەراكتيۆتى مادەني باعدارلاما فورماتىندا ءوتتى. باعدارلاما بارىسىندا قاتىسۋشىلار امال مەرەكەسىنىڭ شىعۋ تاريحىمەن تانىسىپ, كورىسۋ ءداستۇرىنىڭ تاربيەلىك مانىمەن تانىستى. سونداي-اق قازاق حالقىنىڭ باتا بەرۋ, ۇلكەنگە قۇرمەت كورسەتۋ, قول الىسىپ كورىسۋ سەكىلدى ۇلتتىق سالت-داستۇرلەرى ساحنالىق كورىنىستەرمەن ۇسىنىلدى. جىر شۋماقتارى دا وقىلدى.
مادەني جيىنعا ۇلتتىق مۋزەي قىزمەتكەرلەرى, مۋزەي قوناقتارى مەن ونەرپازدار قاتىستى. اتاپ ايتساق, «بوزوق» مەملەكەتتىك تاريحي-مادەني مۋزەي-قورىعى, «گەرالديكالىق زەرتتەۋلەر ورتالىعى» رەسپۋبليكالىق مەملەكەتتىك مەكەمەسى مەن يۋنەسكو قامقورلىعىنداعى حالىقارالىق مادەنيەتتەردى جاقىنداستىرۋ ورتالىعىنىڭ قىزمەتكەرلەرى, استانا قالاسى اكىمدىگىنىڭ جانىنداعى «قوعامدىق كەلىسىم» كمم دوستىق ءۇيى وكىلدەرى, قر ۇقك شەكارا قىزمەتىنىڭ ءانسامبلى, استانا قالاسى اكىمدىگىنە قاراستى «ناز» مەملەكەتتىك بي تەاترىنىڭ انشىلەرى, ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ ستۋدەنتتەرى ءتالىمدى ءىس-شارانىڭ كۋاسى بولدى.
كەڭ كولەمدە ۇيىمداستىرىلىپ وتىرعان جيىن تۇركى حالىقتارىنىڭ كورىسۋ ادەبىن, ەتنوستىق ونەرىن, سالت-ءداستۇرىن, تۇركى حالىقتارىنىڭ ءداستۇرلى كيىمدەرىن قالىڭ كورەرمەنگە ايگىلەپ, ەتنومادەني مۇراسىن جاڭعىرتۋدى كوزدەيدى.