ەلىمىز ەگەمەندىگىن العالى بەرى, 1991 جىلدارى 25 ميلليون توننادان باستاۋ العان مۇناي ءوندىرۋ كولەمى بەرتىن كەلە ارتىپ, 2014 جىلدىڭ ەسەبى بويىنشا 80,8 ميلليون تونناعا وسكەن. ول دەگەنىمىز, باستاپقىدان 3 ەسەگە ۇلعايعانىن كورسەتىپ وتىر. بۇل كولەممەن توقتاماي, الەمدە بولىپ جاتقان ەكونوميكالىق احۋالدارعا قاراماستان, ءبىزدىڭ ەلدە مۇناي ءوندىرۋ كولەمىن ارتتىرۋ جوسپاردا بار. ايتار بولساق, 2017 جىلى 86 ميلليون توننا, ال 2020 جىلدارعا قاراي 104 ميلليون توننا وندىرۋگە جاعدايلار جاسالۋدا.
بۇل جونىندە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن جيىندا ەنەرگەتيكا ۆيتسە-ءمينيسترى ۇزاقباي قارابالين ءمالىم ەتتى. سونىمەن قاتار ول, مۇناي وندىرۋدەن الدا تۇرعان ەلىمىزدەگى بىرقاتار كوشباسشى وڭىرلەردى اتاپ ءوتتى. ونىڭ ايتۋىنشا, ءبىرىنشى ورىندا تۇرعان اتىراۋ وبلىسى, ءبىر جىلدىق مۇناي ءوندىرۋ كولەمى 32,2 ميلليون توننا, ودان كەيىنگى – 18,5 ميلليون توننا كولەم كورسەتكىشىمەن ماڭعىستاۋ وبلىسى تۇر, سونىمەن قاتار باتىس قازاقستان وبلىسى 13,1 ميلليون توننا مۇناي وندىرگەن.
سونىمەن بىرگە, ۇ.قارابالين مۇناي كولەمىنىڭ ارتۋى جاعىنان الدا تۇرعان بىرنەشە كومپانيالاردى دا حابارلادى. اتاپ ايتقاندا, ءبىرىنشى ورىندا «تەڭىزشەۆرويل» جشس تۇر, ول وتكەن جىلدىڭ ەسەبى بويىنشا ءبىر جىلدا 26,7 ميلليون توننا مۇناي وندىرگەن. كەلەسى ورىنعا جىلىنا 12,2 ميلليون توننا مۇناي وندىرگەن «قاراشىعاناق پەترولەۋم وپەرەيتينگ» كومپانياسى شىقتى, دەيدى ۆيتسە-مينيستر. جانە دە ودان كەيىنگى كەزەكتەردە «قازمۇنايگاز», «ماڭعىستاۋمۇنايگاز», «اقتوبەمۇنايگاز», «قازگەرمۇنايگاز» ت.ب. سەكىلدى كومپانيالاردىڭ اتتارى اتالدى.
ۇ.قارابالين ءمالىم ەتكەندەي, پايدالى قازبانىڭ مول قورىنىڭ ارقاسىندا, ءبىزدىڭ ەلىمىز مۇنايلى ەلدەردىڭ اراسىندا 12-ءشى ورىنعا يە. 80,8 ميلليون توننا كورسەتكىشپەن مۇناي وندىرۋدەن قازاقستان 17-ءشى ورىنعا شىقتى, دەدى ۆيتسە-مينيستر.
ەلميرا ماتىباەۆا,
«ەگەمەن قازاقستان».