كەشە ورتالىق كوممۋنيكاتسيالار قىزمەتىندە «قازاقستان تەمىر جولى» ۇك» اق-تىڭ كورپوراتيۆتىك دامۋ بويىنشا باسقارۋشى ديرەكتور ەركىن جۋسانباەۆ پەن ترانسفورماتسيالاۋ بلوگىنىڭ جەتەكشىسى الما ساۋلەباەۆا ءباسپاسوز ءماسليحاتىن وتكىزدى.
ەلىمىزدى ەڭ دامىعان 30 مەملەكەتتىڭ قاتارىنا قوسۋ تۇرعىسىندا ەلباسىنىڭ بەرگەن تاپسىرماسىنا وراي, ۇلتتىق كومپانيادا بيزنەستى ترانسفورماتسيالاۋ شاراسى باستالىپ, ونىڭ قالاي جۇرگىزىلىپ جاتقانى جونىندە اڭگىمەلەگەن باسقارۋشى ديرەكتور, ونىڭ ءتيىمدى تۇستارىنا توقتالدى. «بىلتىر «سامۇرىق-قازىنا» قورىنا قاراستى ەنشىلەس كومپانيالار – «قتج» ۇك» اق, قازپوشتا, قازمۇنايگاز, قازاتومپروم جانە باسقالارىندا بيزنەستى ترانسفورماتسيالاۋ باستالدى. ترانسفورماتسيا كومپانيانىڭ بيزنەس ۇدەرىسىنە تەرەڭ تالداۋ جاسايدى. سول ارقىلى ءونىمسىز باعىتتاردى الىپ تاستاپ, نارىقتاعى قاجەتتى قىزمەت تۇرلەرى مەن تەحنولوگيالاردى, ۇسىنىستاردى قابىلداپ, وندىرىسكە ەنگىزەدى. قتج-دا العاشقىلاردىڭ ءبىرى بولىپ تاجىريبەلى ساراپشىلاردىڭ قاتىسۋىمەن ترانسفورماتسيا كومانداسى قۇرىلدى. بۇگىنگى تاڭدا ولار حالىقارالىق تاجىريبەگە سۇيەنىپ, جاڭا بيزنەس-مودەل مەن حولدينگتىڭ ۇدەرىسى كارتاسىن جاساۋدا. سول ارقىلى كومپانيا تيىمدىلىكتىڭ جاڭا دەڭگەيى مەن قىزمەت كورسەتۋدىڭ جاڭا ساپالىق تۇرىنە كوشەدى», دەدى ە.جۋسانباەۆ.
ادام الەۋەتىن بارىنشا اشىپ, تالانتىن شىڭداۋ ءۇشىن وعان بارىنشا قولايلى جاعداي جاساۋ كومپانيانىڭ بەدەلىنىڭ وسۋىنە جانە بيزنەس ۇدەرىسىنىڭ تيىمدىلىگىن كوتەرۋگە كومەكتەسەتىنىن ايتقان ا.ساۋلەباەۆا, بۇل شارانى تەمىرجولشىلاردىڭ قالاي قابىلداعانى تۋرالى دا اڭگىمەلەدى. «كومپانيادا بيزنەستى ترانسفورماتسيالاۋ شاراسىن اۋەلگى كەزدە دۇرىس تۇسىنبەي, بىزگە ونىڭ نە قاجەتى بار دەگەن ازاماتتار دا بولدى. بۇل يگى شارانىڭ ءمان-ماڭىزى جونىندە ءتۇسىندىرۋ جۇمىستارى جۇيەلى جۇرگىزىلگەن سوڭ, تەمىرجولشىلار ەلگە پايداسى مول بولاتىن جوبانى ءبىراۋىزدان قۇپتاپ جاتىر», دەدى.
نۇرباي ەلمۇراتوۆ,
«ەگەمەن قازاقستان».