كەشە «قازاقستان تەمىر جولى» ۇك» اق-تىڭ پرەزيدەنتى اسقار مامين باستاعان دەلەگاتسيا ليانيۋنگان – الماتى تۇراقتى كونتەينەرلىك پويىزىن شىعارىپ سالۋ راسىمىنە قاتىستى. شىعارىپ سالۋ سالتاناتىنا تسزيانسۋ پروۆينتسياسىنىڭ ۆيتسە-گۋبەرناتورى شي حەپين, ليانيۋنگان قالالىق پارتيا كوميتەتىنىڭ حاتشىسى يان سينشي مەن باسقا دا رەسمي ادامدار قاتىستى.
ليانيۋنگان قالاسىنداعى پورتتاعى قازاقستان – قىتاي بىرلەسكەن تەرمينالى ەلباسى نۇرسۇلتان نازارباەۆتىڭ باستاماشىلىعىمەن اشىلعان. كولىكتىك-لوگيستيكالىق تەرمينال قازاقستاننىڭ تەمىرجول كولىگى ارقىلى ترانزيتتىك الەۋەتى مەن ەكسپورتتىق-يمپورتتىق جاعدايىن دامىتۋعا باعىتتالعان. ول وڭتۇستىك – شىعىس ازيا مەن ازيا – تىنىق مۇحيت ايماعى ەلدەرىنە شىعاتىن قىسقا باعدارلار مەن ورتالىق ازيا ەلدەرىن, پارسى شىعاناعى, رەسەي, كاۆكاز ايماعى جانە ەۋروپامەن جالعايدى. اتالعان جوبا پرەزيدەنت ن. نازارباەۆتىڭ «نۇرلى جول» قازاقستاندىق ساياساتى مەن قحر توراعاسى سي تسزينپين قولداعان جاڭا جىبەك جولى ەكونوميكالىق بەلدەۋىن دامىتۋعا ىقپال ەتەدى.
«قازاقستان تەمىر جولى» ۇك» اق دەلەگاتسياسى تسزيانتسۋ پروۆينتسياسى مەن ليانيۋنگان قالاسى باسشىلىعىمەن جۇمىس كەزدەسۋى بارىسىندا تاراپتار قازاقستان – قىتاي بىرلەسكەن تەرمينالىن دامىتۋ ديناميكاسىنىڭ جوعارى ەكەندىگىن ەرەكشە اتاپ ءوتتى. 2014 جىلى 19 مامىردا جۇمىسىن باستاعان تەرمينالدان 65 مىڭ كونتەينەر وڭدەۋدەن وتكىزىلدى. بيىلعى جىلى 250 مىڭ دفە كونتەينەرىن وڭدەۋدەن وتكىزۋ جوسپارلانىپ وتىر.
تسزيانسۋ پروۆينتسياسىندا 74 ميلليون ادام تۇرادى. دامىعان ايماقتىڭ ءىجو-ءسى 100 ملرد. اقش دوللارىنان اسادى. ال ليانيۋنگان تەڭىز پورتى جىلىنا 210 ميلليون توننا جۇك وتكىزەتىن الەمنىڭ 20 ءىرى پورتى قاتارىنا جاتادى.
«ەگەمەن-اقپارات».