اقمولا وبلىسىنىڭ جاقسى اۋدانىندا ۇلى جەڭىستىڭ 70 جىلدىعى قارساڭىندا جانە «ءومىر جولى» جوباسىنىڭ اياسىندا ۇلى وتان سوعىسىنىڭ ارداگەرى اناتولي كومياكوۆقا ورتالىقتاندىرىلعان «SOS» جۇيەسىنە قوسىلعان دابىل تەلەفونى تابىس ەتىلدى.
اناتولي ۆاسيلەۆيچ رەسەيدىڭ كوستروما وبلىسىندا تۋعان. اسكەر قاتارىنا 1943 جىلى شاقىرىلىپ, 3-ءشى ۋكراينا مايدانىنا جىبەرىلگەن. جەڭىس كۇنىنە دەيىن ول 244-ءشى ديۆيزيانىڭ 325-ءشى بارلاۋشىلار روتاسىندا قىزمەت ەتكەن.
اناتولي ۆاسيلەۆيچتىڭ ايتۋىنشا, ونىڭ دەنەسىنەن بىرنەشە رەت وتا جاساۋ ارقىلى 250 سنارياد جارىقشاعى الىنىپتى. ا.كومياكوۆ ءىىى دارەجەلى «داڭق» وردەنىمەن ماراپاتتالعان. ول ۆەنگريا, اۆستريا سياقتى ەلدەردەگى قيان-كەسكى شايقاستارعا قاتىسىپ, جەڭىستى رۋمىنيادا قارسى الىپتى. 1945 جىلى ەلگە ورالعان ارداگەر شارۋاشىلىقتا ۇستا بولىپ جۇمىس ىستەگەن.
جەڭىس جاۋىنگەرى 1968 جىلى وتباسىمەن بىرگە جاقسى اۋدانىنا قاراستى قايراقتى اۋىلىنا كوشىپ كەلىپ, بۇگىنگى كۇنگە دەيىن وسىندا تۇرىپ جاتىر. ءوزىنىڭ سۇيىكتى ءىسى – ۇستالىق جۇمىسقا 33 جىل ءومىرىن ارنادى. ول زەينەتكەرلىككە شىققان سوڭ دا اۋىلداعى كوپتەگەن جۇمىستارعا ارالاسىپ ءجۇردى. سەبەبى, ونىڭ ۇزاق جىلدارعى ءتاجىريبەسى مەن بىلىكتىلىگى ەلگە قاشان دا قاجەت.
باقبەرگەن امالبەك,
«ەگەمەن قازاقستان».
اقمولا وبلىسى,
جاقسى اۋدانى.