ەل تاۋەلسىزدىگىنىڭ 35 جىلدىعىنا, ۇلت كوسەمى ءاليحان بوكەيحاننىڭ تۋعانىنا 160 جىل تولۋىنا وراي بەلگىلى ۆەلومارافونشى, ۆەلوشەرۋ وتكىزۋدەن ءۇش دۇركىن رەكوردشى ەرنات راحمەتوللا ەرەكشە باستاما جاريالادى. اتاپ ايتقاندا, ۆەلوشاباندوز قىس مەزگىلىندە ءبىر كۇن ىشىندە 160 شاقىرىمدى ءجۇرىپ ءوتىپ, الەمدىك رەكورد ورناتۋدى ماقسات ەتەدى.
ول بۇعان دەيىن 2022 جىلدىڭ 10 اقپانىندا ەلورداداعى ترياتلون پاركىندە 150 شاقىرىمدى 9 ساعات 56 مينۋتتا باعىندىرىپ, بۇل كورسەتكىش قازاقستان رەكوردتار كىتابىنا العاشقى قىسقى ۆەلومارافون رەتىندە ەنگەن. كەيىن رامازان ايى كەزىندە دە ەرەكشە شارتپەن سىنعا ءتۇسىپ, 109 شاقىرىمدى قىسقا ۋاقىتتا ءجۇرىپ ءوتۋ ارقىلى تاعى ءبىر رەكورد تىركەگەن.
جالپى, ول ۆەلوشەرۋدى كوبىنە تۇلعالار مەرەيتويىمەن بايلانىستىرىپ, قوعامدىق ۇندەۋگە اينالدىرىپ كەلەدى. ماسەلەن, 2024 جىلى مۇستافا وزتۇرىكتىڭ 70 جىلدىعىنا وراي بايتەرەكتەن باستالعان باعىتپەن 70 شاقىرىمدى 5 ساعاتتا ءجۇرىپ وتكەن. ۇيىمداستىرۋشىلاردىڭ ايتۋىنشا, مۇنداي باستامالار جاستاردى شىدامدىلىققا, سالاماتتى ءومىر سالتىنا, تاباندىلىققا شاقىرۋدى كوزدەيدى.
بۇل جولعى جوبانىڭ دا وزىندىك ءمانى بار. 160 شاقىرىم – ۇلت كوسەمىنىڭ 160 جىلدىق مەرەيتويىنا ارنالسا, قىسقى جاعدايدا ءبىر كۇندە ەڭسەرىلەتىن قاشىقتىق – تاۋەلسىز ەل جاستارىنىڭ ءتوزىمى مەن اسقاق رۋحىنىڭ بەلگىسى. بۇل باستاما سپورتتىق كورسەتكىش قانا ەمەس, تاريحي جادتى جاڭعىرتىپ, ۇلتتىق قۇندىلىقتاردى دارىپتەۋگە باعىتتالعان قوعامدىق ۇندەۋ رەتىندە ۇسىنىلىپ وتىر.
جاڭا جوبانىڭ وزەگى – جەكە جەتىستىك ەمەس, ورتاق رۋحتى وياتۋ. ەرناتتىڭ سوزىنشە, رەكورد حالىقارالىق تالاپتارعا ساي راسىمدەلىپ, رەسمي تۇردە تىركەلۋگە ءتيىس, سونداي-اق باستاماعا باق وكىلدەرى مەن دەمەۋشىلەردى تارتۋ جوسپارلانعان.
«بۇل – جەكە كورسەتكىشتەن بۇرىن تاريحي جاۋاپكەرشىلىك. ءار بۋىن ءوز ءداۋىرىنىڭ سىنىنان وتەدى. ءبىزدىڭ سىن – تاۋەلسىزدىكتىڭ قادىرىن ءىس ارقىلى كورسەتۋ», دەيدى جوبا اۆتورى.