استانا. 25 اقپان. رەسەي فەدەراتسياسىنىڭ مەملەكەتتىك دۋماسى ۆولگوگراد قالاسىنا بۇرىنعى «ستالينگراد» دەگەن تاريحي اتاۋىن قايتىپ بەرۋدەن باس تارتتى. بۇل تۋرالى Lenta.ru حابارلادى.
ۇسىنىستى دۋماداعى كوممۋنيستىك پارتيا فراكتسياسى 12 اقپان كۇنى بەرگەن بولاتىن. كوممۋنيستەر سونىمەن بىرگە ماسكەۋ قالاسىنداعى ورتالىق الاڭداردىڭ نەمەسە كوشەلەردىڭ ءبىرىن يوسيف ءستاليننىڭ اتىمەن اتاپ, گەنەراليسيمۋستىڭ ەسكەرتكىشىن ورناتۋ تۋرالى دا ۇسىنىس ەنگىزگەن ەدى.
«اتتى اۋىستىرۋ تەك قانا ۆولگوگراد وبلىستىق دۋماسىنىڭ قۇقىعىنا جاتادى. ال ماسكەۋدەگى كوشە اتىن بەرۋ مەن ەسكەرتكىش ورناتۋدى ماسكەۋ بيلىگىنىڭ قۇزىرلى ورگاندارىندا», - دەپ اتاپ كورسەتتى مەملەكەتتىك دۋمانىڭ فەدەراتيۆتى قۇرىلىمدار جانە جەرگىلىكتى ءوزىن ءوزى باسقارۋ ماسەلەلەرى جونىندەگى كوميتەتى توراعاسىنىڭ ورىنباسارى ۆيكتور كازاكوۆ.
بۇدان بۇرىن مەملەكەتتىك دۋمانىڭ ءپروفيلدى كوميەتى قاۋلى جوباسىن الىپ تاستاۋدى ۇسىنعان بولاتىن.
وتكەن جىلى پرەزيدەنت ۆلاديمير پۋتين ۆولگوگرادتىڭ تاريحي اتىن رەفەرەندۋم جولىمەن قايتارۋعا بولاتىنىن جوققا شىعارماعان ەدى. ويتكەنى, رەسەيدىڭ ەكىنشى دۇنيەجۇزىلىك سوعىستاعى ارداگەرلەرىنىڭ ءبىرى وعان وسىنداي ءوتىنىش بىلدىرگەن-ءتىن.
2013 جىلى ۆولگوگراد قالالىق دۋماسىنىڭ دەپۋتاتتارى ۇلى جەڭىستىڭ سالتاناتى كۇندەرى «قاھارمان-قالا ستالينگراد» دەگەن اتاۋدى قولدانۋ تۋرالى شەشىم قابىلدادى.
قالانىڭ نەگىزى 1859 جىلى قالانعاندا ول تساريتسىن دەپ اتالعان. 1925 جىلى ول ستالينگرادقا اينالدى. سەبەبى, اتامان پەتر كراسنوۆتىڭ بولىمدەرى قالاعا شابۋىل جاساعاندا, ونىڭ قورعانىسىن ستالين باسقارعان ەكەن. 1961 جىلى جەكە باسقا تابىنۋمەن كۇرەس شەڭبەرىندە ەلدى مەكەننىڭ اتاۋى ۆولگوگراد بولىپ وزگەرتىلدى.
مۇرات ايتقوجا.