ۇكىمەت فارماتسەۆتيكا سالاسىنداعى ءىرى جوبالاردىڭ بىرىنە قولداۋ كورسەتتى. دەنساۋلىق ساقتاۋ مينيسترلىگى مەن «حيمفارم» اق اراسىندا حالىقتى قولجەتىمدى ءدارى-دارمەكپەن قامتۋ جانە وتاندىق ءوندىرىستىڭ ۇلەسىن ارتتىرۋعا باعىتتالعان ينۆەستيتسيالىق كەلىسىم بەكىتىلدى. قاۋلىعا پرەمەر-مينيستر ولجاس بەكتەنوۆ قول قويدى, دەپ جازادى Egemen.kz.
بۇل شەشىم شىمكەنتتەگى Polpharma Santo كاسىپورنىندا جۇزەگە اساتىن ءىرى جوبانىڭ جاڭا كەزەڭىن باستاۋعا جول اشتى. الداعى ۋاقىتتا مۇندا 300 جاڭا جۇمىس ورنى قۇرىلىپ, سالاعا 39,5 ملرد تەڭگە كولەمىندە جەكە ينۆەستيتسيا تارتىلادى. ونىڭ ىشىندە عىلىمي زەرتتەۋلەردى دامىتۋعا باعىتتالعان قاراجات تا بار. جاڭا ءوندىرىستىڭ العاشقى كەزەڭى 2029 جىلدىڭ سوڭىنا قاراي ىسكە قوسىلماق.
ەلىمىزدە قانداي ءدارى-دارمەكتەر وندىرىلەدى؟
جوبا اياسىندا ونكولوگيالىق, جۇرەك-قان تامىر, ينفەكتسيالىق جانە سوزىلمالى اۋرۋلاردى, سونىڭ ىشىندە تۋبەركۋلەزدى ەمدەۋگە ارنالعان 38 ءتۇرلى دارىلىك پرەپارات وندىرىلەدى. بارلىق ءونىم حالىقارالىق ساپا تالاپتارىنا ساي شىعارىلادى.
باستاما وتاندىق وندىرۋشىلەردىڭ ۇلەسىن كوبەيتىپ قانا قويماي, ەلدىڭ دارىلىك قاۋىپسىزدىگىن نىعايتۋعا, فارماتسەۆتيكا سالاسىندا تۇراقتى تەحنولوگيالىق بازا قالىپتاستىرۋعا مۇمكىندىك بەرەدى. حالىق ءۇشىن ءدارى-دارمەكتىڭ قولجەتىمدىلىگى مەن ساپاسى دا باستى نازاردا. سونىمەن بىرگە ەكسپورتتىق الەۋەتتى ارتتىرۋ كوزدەلگەن.
ەڭ ءىرى بيوفارماتسەۆتيكالىق كەشەن سالىنادى
ايتا كەتەيىك, بۇگىندە فارماتسەۆتيكالىق ونىمدەر ءوندىرىسى سالاسىندا جالپى سوماسى 316,3 ملرد تەڭگەنى قۇرايتىن 6 ينۆەستيتسيالىق كەلىسىم جاسالعان. بۇل باعىتتىڭ جۇيەلى تۇردە دامىپ كەلە جاتقانىن جانە قازاقستاندا ءدارى-دارمەك ءوندىرىسىن جەرگىلىكتەندىرۋگە بەرىك نەگىز قالانعانىن كورسەتەدى.
فارماتسەۆتيكادا وتاندىق وندىرۋشىلەردىڭ ۇلەسى قاشان ارتادى؟