استانا. 25 اقپان. باس پروكۋروردىڭ ءبىرىنشى ورىنباسارى يوگان مەركەل دۇنيەجۇزىلىك بانك دەلەگاتسياسىمەن كەزدەستى. تاراپتار سوت تورەلىگى سەكتورىن ينستيتۋتسيونالدىق نىعايتۋ جوباسىنىڭ ماڭىزدى ءىس-شارالارىنىڭ جۇزەگە اسىرىلۋىن تالقىلادى. بۇل تۋراالى باس پروكۋراتۋرانىڭ ءباسپاسوز قىزمەتى حابارلادى.
ي.مەركەل سوت تورەلىگىنىڭ مۇمكىندىكتەرى مەن تيىمدىلىگىن ارتتىرۋ, اقپاراتتىق تەحنولوگيالاردى دامىتۋ مەن بيزنەس ءۇشىن قۇقىقتىق ورتانى جاقسارتۋ جونىندەگى جۇمىستاردى جالعاستىرۋعا مۇددەلىلىگىن ءبىلدىردى.
كەزدەسۋدە قۇقىق بۇزۋشىلىقتىڭ جۇيەلى پروفيلاكتيكاسىن ازىرلەۋ, قۇقىق قورعاۋ ورگاندارىن جاڭعىرتۋ, سونىڭ ىشىندە كادر ساياساتى تۇجىرىمداماسى بويىنشا شارالاردى جۇزەگە اسىرۋ, ەلەكتروندىق بىلەزىكتەردى ءوندىرۋدى ۇيىمداستىرۋ, جەكەنىڭ جانە مەملەكەتتىڭ سەرىكتەستىگى نەگىزىندە كامەرالىق سيپاتتاعى تۇزەۋ مەكەمەلەرىن سالۋ, «ە-ايىپپۇل» بىرىڭعاي اقپاراتتىق جۇيەسىن ەنگىزۋ جونىندەگى شارالاردى جۇزەگە اسىرۋدىڭ وزەكتى ماسەلەلەرى تالقىلاندى.
جوبانى جۇزەگە اسىرۋعا بولىنگەن قاراجاتتى ءتيىمدى پايدالانۋ اڭگىمەنىڭ بولەك تاقىرىبىنا اينالدى.
دۇنيەجۇزىلىك بانك دەلەگاتسياسىنىڭ جەتەكشىسى اميتابح مۋحەردجي جوبانى جۇزەگە اسىرۋداعى قازاقستاندىق پروكۋراتۋرانىڭ ءرولىن جوعارى باعالاپ, قاراجاتتى ءتيىمدى پايدالانۋ ماسەلەلەرى بويىنشا ءوزارا ءىس-قيمىلدى جالعاستىرۋعا نيەتتى ەكەنىن راستادى.
تاراپتار بولىپ وتكەن كەزدەسۋدىڭ قالىپتاسقان قارىم-قاتىناستىڭ ودان ءارى دامۋى جولىنداعى جوعارى ماڭىزدىلىعىن, ونىڭ كەلەشەكتە قازاقستاننىڭ جاڭا قۇقىقتىق دامۋىنداعى ايتارلىقتاي ناتيجەلەرگە قول جەتكىزۋىنە مۇمكىندىك بەرەتىنىن اتاپ ءوتتى.
جولدىباي بازار.
دەرەك, سۋرەت: باس پروكۋراتۋرانىڭ ءباسپاسوز قىزمەتى.