قوستاناي. 25 اقپان. قوستانايدا ل.تولستوي اتىنداعى وبلىستىق امبەباپ كىتاپحانادا جاس اقىن ابىلاي ماۋدانوۆتىڭ «سارى داپتەر» كىتابىنىڭ تۇساۋكەسەرى ءوتتى. بۇل تۋرالى egemen.kz ءتىلشىسى حابارلادى.
«سارى داپتەر» – ابىلايدىڭ تۇڭعىش جىر كىتابى. اقىن ولەڭدەرى بۇعان دەيىن بىرنەشە جىر جيناقتارىندا جارىق كورگەن بولاتىن. سونىمەن قاتار قوستانايدا وتكەن جىر سايىستارىندا جانە «ءبىر ولەڭ – ءبىر الەم» ءمۇشايراسىندا ءۇشىنشى, «شابىت» رەسپۋبليكالىق فەستيۆالى اياسىنداعى جىر بايگەسىندە باس جۇلدەنى جەڭىپ العان بولاتىن. ال مىنا تۇڭعىش جىر كىتابىنىڭ تۇساۋكەسەرى ابىلايدىڭ ولەڭ ولكەسىندەگى تالانت ەكەنىن ايعاقتايدى. جىر كەشىنە ۇلكەندى-كىشىلى وقىرماندار كوپ جينالدى. ولەڭ ولكەسىنە قانات قاققان ابىلاي ماۋدانوۆ پەن ونىڭ وسى وڭىردەگى تۇرعىلاستارى قوستاناي توپىراعى قۇنارىنىڭ ازباعاندىعىنا دالەل. سوڭىنان ەرگەندەرگە اقىل-كەڭەس, پىكىرىن ايتاتىن عۇمار احمەتچين, سەرىكباي وسپان ۇلى, ءاسيا بەركەنوۆا, اقىلبەك شاياحمەت, ناعاشىباي مۇقاتوۆ سەكىلدى ادەبيەت مايدانىندا ءوزىن مويىنداتقاندار دا تۇساۋكەسەردە وتىردى.
سەرىكباي وسپان ۇلى: «قادىر ايتقانداي, اقىن باسقالار ايتا الماعان ءسوزدى ايتۋى كەرەك... ابىلاي – ليريك اقىن. ابىلاي باقىتىن ليريكادان ىزدەۋى كەرەك. ليريكا دەگەن ءسوز نازىكتىك, ابىلايدىڭ جانى سول» دەسە, اقىن اقىلبەك شاياحمەت: «ابىلايدا كەڭشىلىك اعاسىنىڭ شۇرايلى ءتىلى, سەرىك تۇرعىنبەكوۆ اعاسىنىڭ ويى, سەيىت اعاسىنىڭ ۋىتتى قالجىڭى بار» دەدى. «ءاسيا بەركەنوۆا: «ادامگەرشىلىك تۋىڭ بولسىن» دەگەندى وسيەتتەدى. ابىلايدىڭ تۋعان جەرى دە تورعاي ءتوسى, قويشىعارا, تولەن, كەڭشىلىك, سەيىت سەكىلدى كوپتەگەن تالانتتاردى بەرگەن ءوڭىر. سوندىقتان ول تۇڭعىش كىتابىنىڭ تۇساۋكەسەر كەشىن «كوكالاتىم--كيەلىم» دەپ اتاپتى.
كەشكە جينالعاندار ابىلاي ماۋدانوۆتىڭ ولەڭىنە جازىلعان مارعۇلان وسپاننىڭ اندەرىن جاس اكتەر اسىلان كەنجەتايدىڭ ورىنداۋىندا تىڭدادى. سونىمەن قاتار ساتيرا اۋىلىندا دا كورىنىپ جۇرەتىن ابىلايدىڭ اڭگىمەلەرى ساحنادان وقىلدى.
ءنازيرا جارىمبەتوۆا.
دەەرك, سۋرەت: egemen.kz.