ساۋران اۋدانى اباي اۋىلىنداعى جاڭاقورعان وزەنىنىڭ ۇستىنەن وتەتىن شاعىن كوپىرگە جاۋىن-شاشىننىڭ مولشەردەن تىس كوپ تۇسۋىنە بايلانىستى زاقىم كەلگەن بولاتىن. تابيعي جاعدايعا بايلانىستى زاقىم كەلگەن كوپىر قىسقا مەرزىم ىشىندە قالپىنا كەلتىرىلدى. سونداي-اق ارنايى تەحنيكالارمەن وزەن ارناسىنىڭ جان-جاعى قازىلىپ, سۋ اعىسىنىڭ باعىتى رەتتەلدى, دەپ حابارلايدى Egemen.kz.
وڭىرلىك كوممۋنيكاتسيالار قىزمەتىندە وتكەن بريفينگتە اۋدان اكىمى ماقسات تاڭعاتاروۆ ەكى جىلدىڭ كولەمىندە 15 كوپىر جوندەۋدەن وتكەنىن اتاپ ءوتتى. قازىرگى تاڭدا اۋداندا وزەكتى بولىپ وتىرعان كوكساراي مەن ەسكى ساۋران كوپىرىندە بيىل قۇرىلىس جۇمىستارى جۇرگىزىلمەك. سۋ تاسقىنىنىڭ الدىن الۋ جانە قاۋىپسىزدىك شارالارىن كۇشەيتۋ باعىتىنداعى جۇمىستار دا جۇيەلى جۇرگىزىلىپ جاتىر.
«1988 جىلى پايدالانۋعا بەرىلگەن اقتوبە سۋ قويماسى وڭىردەگى ماڭىزدى گيدروتەحنيكالىق نىسانداردىڭ ءبىرى سانالادى. سىيىمدىلىعى 6,11 ملن تەكشە مەتردى قۇرايتىن سۋ قويماسى 880 گەكتار ەگىستىك القاپتى سۋمەن قامتاماسىز ەتۋگە مۇمكىندىك بەرەدى. سۋ ايدىنىنىڭ اۋماعى – 1,30 شارشى شاقىرىم, تەرەڭدىگى – 14 مەتر, ۇزىندىعى – 1750 مەتر. مامانداردىڭ مالىمەتىنشە, قازىرگى تاڭدا سۋ قويماسى شتاتتىق رەجيمدە جۇمىس ىستەپ جاتىر. قاشىرتقىنىڭ سۋ تاستاۋ قابىلەتى سەكۋندىنا 60 تەكشە مەتردى قۇرايدى, ال باس سۋ بولگىش قۇرىلىمى ارقىلى سەكۋندىنا 2 تەكشە مەتر سۋ جىبەرىلەدى. سۋ قويماسىنداعى جاعداي باقىلاۋدا», دەدى ماقسات تاڭعاتاروۆ.
قارعالى سۋ قويماسىنا كۇردەلى جوندەۋ جۇرگىزىلەدى
سونداي-اق اۋدان اكىمى 2030 جىلعا دەيىنگى دامۋ جوسپارى ازىرلەنگەنىن ايتىپ ءوتتى. بۇل ورايدا اۋدان 3 باعىت, ياعني اۋىل شارۋاشىلىعى, ونەركاسىپ جانە تۋريزم سالاسى بويىنشا داميدى.
تۇركىستان وبلىسىندا جاڭا ەكى سۋ قويماسىنىڭ قۇرىلىسى اياقتالۋعا جاقىن