ەلىمىزدىڭ سۋ قويمالارى تاسقىن سۋعا دايىن با؟

وڭىرلەردەگى احۋال

سۋ رەسۋرستارى جانە يرريگاتسيا مينيسترلىگى سولتۇستىك, ورتالىق, باتىس جانە شىعىس ايماقتارداعى سۋ قويمالارىندا بوس كولەمدى قامتاماسىز ەتۋ جۇمىستارىن جۇرگىزىپ جاتىر. ال وڭتۇستىكتەگى نىساندار سۋ جيناۋ رەجيمىنە كوشتى.

قازىرگى مالىمەت بويىنشا:

سولتۇستىكتەگى ءىرى سۋ قويمالارى – 70%,

ورتالىق وڭىرلەردە – 68%,

باتىستا – 48%,

شىعىستا – 86% تولعان.

بۇل كورسەتكىشتەر تاسقىن سۋىن قاۋىپسىز قابىلداۋعا مۇمكىندىك بەرەتىن رەزەرۆتىڭ بار ەكەنىن اڭعارتادى.

شەكارالاس ەلدەرمەن بىرلەسكەن ءىس-قيمىل

سۋ تاسقىنى قاتەرى ترانسشەكارالىق وزەندەرگە دە بايلانىستى. وسىعان وراي 2025 جىلى قازاقستان مەن رەسەي اراسىندا ارنايى جۇمىس توبى قۇرىلدى. ءتورتىنشى وتىرىسقا دايىندىق بارىسىندا الداعى تاسقىن كەزەڭىندەگى ءوزارا ءىس-قيمىل ماسەلەلەرى تالقىلاندى.

رەسەي تاراپىنىڭ الدىن الا دەرەگىنە سايكەس, تاسقىن كەزىندە يريكلا سۋ قويماسىنان سەكۋندىنا 200 تەكشە مەتردەن اسپايتىن كولەمدە سۋ جىبەرۋ جوسپارلانعان. جايىق وزەنى باسسەينى بويىنشا ناقتى بولجام ناۋرىز ايىنىڭ باستاپقى تۇسىندا جاريالانادى.

قىتايمەن ترانسشەكارالىق سۋدىڭ ساپاسىن باقىلاۋ جانە جەدەل اقپارات الماسۋ جۇيەسى جۇمىس ىستەپ تۇر. ول گيدرولوگيالىق بەكەتتەردەگى وقۋ-جاتتىعۋلار مەن بايلانىس ارنالارىنىڭ دايىندىعىن تەكسەرۋدى قامتيدى.

تارازداعى تاسقىن قاۋپى: تجم مەن اكىمدىك شۇعىل ىسكە كىرىستى

گيدروتەحنيكالىق نىساندار جاڭعىرتىلىپ جاتىر

تاسقىننىڭ الدىن الۋدا گيدروتەحنيكالىق قۇرىلىسجايلاردىڭ قاۋىپسىزدىگى ايرىقشا مانگە يە. بيىل 56 نىساندا كوپفاكتورلى تەكسەرۋ جۇرگىزىلدى.

مينيسترلىك ۇسىنىمدارى نەگىزىندە 39 نىساندا جوندەۋ جۇمىستارى اتقارىلدى. اتاپ ايتقاندا,

اباي وبلىسىنداعى شار سۋ قويماسىندا,

شىمكەنت قالاسىنداعى «اقجار» سۋ قويماسىندا,

اقتوبە وبلىسىنداعى «شولاق» بوگەتىندە كۇردەلى جوندەۋ اياقتالدى.

سونىمەن قاتار قوستاناي وبلىسى ستەپنوە اۋىلىنداعى بوگەت قايتا جاڭعىرتىلدى.

مەملەكەت باسشىسىنىڭ تاپسىرماسىمەن 10 وبلىستا كوممۋنالدىق گيدروتەحنيكالىق نىسانداردى باسقارۋعا ارنالعان مامانداندىرىلعان ۇيىمدار قۇرىلدى. قازىر ولاردىڭ سانى 16-عا جەتىپ, 1193 مامان 846 نىسانعا قىزمەت كورسەتىپ وتىر.

وزەن ارنالارىن تازارتۋ جۇمىستارى

2025-2027 جىلدارعا ارنالعان جول كارتاسى شەڭبەرىندە ەلدى مەكەندەر ماڭىنداعى وزەن ۋچاسكەلەرىن قالپىنا كەلتىرۋ جۇمىستارى جۇرگىزىلىپ جاتىر. بۇگىنگە دەيىن 166,98 شاقىرىم وزەن ارناسى تازارتىلىپ, تەرەڭدەتىلدى.

بيىل 6 وبلىستا جالپى ۇزىندىعى 192,55 شاقىرىمدىق وزەن بولىكتەرىندە ساناتسيا جۇرگىزۋ جوسپارلانعان.

سۋ تاسقىنى قاۋپى: قوستاناي وبلىسىنىڭ اكىمى شۇعىل تاپسىرما بەردى

جۇيەلى باقىلاۋ جالعاسادى

سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى نۇرلان الدامجاروۆتىڭ ايتۋىنشا, كوكتەمگى تاسقىنعا دايىندىق كەشەندى تۇردە جۇزەگە اسىرىلىپ جاتىر. ارنايى تەحنيكا مەن قاجەتتى ماتەريالدار ازىرلەنگەن, دەرەكتەر الماسۋ جولعا قويىلعان. ءار 10 كۇن سايىن سۋ قويمالارىنىڭ جۇمىس رەجيمى قايتا ەسەپتەلەدى.

مينيسترلىك سۋ شارۋاشىلىعى نىساندارىنىڭ جاعدايىن كۇن سايىن باقىلاپ وتىر. اكىمدىكتەرمەن بىرلەسە وتىرىپ, تاسقىن قاۋپىن ازايتۋ جانە حالىق پەن ينفراقۇرىلىم قاۋىپسىزدىگىن قامتاماسىز ەتۋ باعىتىنداعى جۇمىستار جالعاسادى.

پرەزيدەنت سۋ تاسقىنى مەن قۇرعاقشىلىق قاۋپىنە الدىن الا دايىندالۋدى تاپسىردى