استانا. 25 اقپان. «بارىس» قۇرلىقتىق حوككەي ليگاسىنىڭ تۇراقتى چەمپيوناتىندا نيجني نوۆگورودتىڭ «تورپەدوسىنان» 4:2 ەسەبىمەن باسىم ءتۇستى. بۇل تۋرالى egemen.kz ءتىلشىسى حابارلادى.
استاناداعى «قازاقستان» سپورت سارايىندا وتكەن ويىن ايدىن يەلەرىنىڭ باسىمدىعىمەن باستالدى. نەبارى 3-مينۋتتا قوناقتار ساپىنان ۆيكتور درۋگوۆ كىشى ايىپپەن جازالانىپ, «بارىس» ويىنشى باسىمدىعىنا يە بولدى. وزدەرىنە بەرىلگەن مۇمكىندىكتى ءمۇلت جىبەرمەگەن استانالىقتار 3-مينۋتتا ەسەپ اشتى. گولدىڭ اۆتورى – نايدجەل دوۋس. ارتىنشا «تورپەدو» ويىنشىلارى دا ەكى مارتە ويىنشى باسىمدىعىنا يە بولعانىمەن, ەسەپتى تەڭەستىرۋگە شامالارى جەتپەدى. ال تارتىستىڭ 13-مينۋتىندا قوس بىردەي قورعاۋشىنى قاپى قالدىرىپ, قاقپاشىمەن بەتپە-بەت شىققان تالعات جايلاۋوۆ كومانداسىنىڭ ەكىنشى شايباسىن سوقتى. بۇل جولى ناتيجەلى شابۋىلدى ۇيىمداستىرعان «بارىس» قاقپاشىسى يان لاتسو مەن شابۋىلشى داستين بويد ەكەنىن ايتا كەتەيىك.
ەكىنشى كەزەڭدە ايدىن يەلەرى نەگىزىنەن قورعانىسقا كوڭىل ءبولىپ, كوبىنە قارىمتا شابۋىلعا يەك ارتا وينادى. قارسىلاستارىنىڭ قارقىنى باسەڭدەگەنىن بايقاعان رەسەيلىكتەر شابۋىلدارىن كۇشەيتتى. ناتيجەسىندە, 38-مينۋتتا نيكيتا دۆۋرەچەنسكي مەرگەندىگىمەن كوزگە ءتۇسىپ, ەسەپ ايىرماسىن قىسقارتتى.
شەشۋشى كەزەڭنىڭ باسىندا دۆۋرەچەنسكي ءدۋبلدىڭ اۆتورى اتانىپ, ەسەپتى تەڭەستىردى. دەسەك تە, استانالىق كوماندا ويىن سوڭىنا دەيىن ەكى شايبا سوعىپ, تۇراقتى چەمپيوناتتىڭ سوڭعى ويىنىن جەڭىسپەن اياقتادى. اتالعان ەكى ناتيجەلى سوققىنى نيكولاي انتروپوۆ پەن كونستانتين پۋشكارەۆ جاساعانىن ايتا كەتەيىك.
وسىمەن قحل-دىڭ تۇراقتى چەمپيوناتى 2014-2015 جىلعى ماۋسىمنىڭ شىمىلدىعىن ءتۇسىردى. ەندى الدا پلەي-وفف كەزەڭى. 28 كوماندانىڭ ىشىنەن ۇزدىك شىققان 16 ۇجىم «گاگارين كۋبوگىن» ساراپقا سالادى. بۇل كەزەڭنىڭ العاشقى ساتىسىندا «بارىس» ومبىلىق «اۆانگاردپەن» وينايدى. قوس كوماندا الدىمەن 28 اقپان جانە 1 ناۋرىز كۇندەرى ومبىدا شەبەرلىك بايقاسادى. ال 3-4 ناۋرىز كۇندەرى «بارىس» «اۆانگاردتى» ءوز ايدىنىندا قابىلدايدى.
ەلامان قوڭىر.
دەرەك: egemen.kz.
سۋرەت: hcbarys.kz.
1