ورال قالاسىندا ءبىر مەزگىلدە 2 مىڭ ادام ناماز وقي الاتىن جاڭا مەشىت اشىلدى. ونىڭ اشىلۋ سالتاناتىنا قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى قاتىستى, دەپ حابارلايدى Egemen.kz.
باتىس قازاقستان وبلىسى ورتالىعىنىڭ زاشاعان كەنتى اۋدانىندا ورنالاسقان جاڭا مەشىتتىڭ قازىعى وسىدان ءۇش جىل بۇرىن, 2023 جىلى مامىر ايىندا قاعىلعان ەدى. سودان بەرى دەمەۋشىلەر مەن ءدىندار جاماعاتتىڭ قولداۋىمەن ساۋلەتتى مەشىت بوي كوتەرىپ, قاسيەتتى رامازان ايىنىڭ باستالۋىنا 2 كۇن قالعاندا پايدالانۋعا بەرىلدى. بۇل ورال قالاسىنداعى ءتورتىنشى, وبلىس بويىنشا 66-نشى مەشىت.
باس ءمۇفتي ءوز سوزىندە ورال تۇرعىندارىن جاڭا مەشىتتىڭ اشىلۋىمەن قۇتتىقتاپ, اقجايىق ءوڭىرى, باتىس قازاقستان وبلىسى اۋەلدەن مۇسىلمان ءدىنىنىڭ تۋى تىگىلگەن, اتا-بابا ءداستۇرى سالتانات قۇرعان ايماق ەكەنىن ايتتى.
«جاڭگىر حان بابامىزدىڭ ۋاقىتىندا بوكەيلىك جۇرتىندا 144 مەشىت بولعان ەكەن. جاڭگىر حان ءار 170 شاڭىراققا ءبىر مولدا بولۋىن ءتارتىپ ەتىپ بەكىتكەن. ول كەزدەگى مولدالار ەلدى يماندىلىققا, اعارتۋشىلىققا, ساۋاتتىلىققا جەتكىزگەن ۇستاز بولدى. قازىر دە سولاي, اللاعا شۇكىر, وبلىستاعى سامات قاناتقالي ۇلى باستاعان يمامدارىمىز حالىققا ادال قىزمەت ەتىپ كەلەدى. قوجا احمەت ياساۋي بابامىزدىڭ دا بىزگە ايتقان وسيەتتەرىنىڭ ءبىرى سول: حاققا قىزمەت ەتۋ – حالىققا قىزمەت ەتۋدەن باستالادى دەگەن. حالىققا قىزمەت ەتۋ ءۇشىن ادام قاراپايىم, كىشىپەيىل بولۋ كەرەك. مىنەكي, بابالارىمىز, ءدىن ۇستانعان قاسيەتتى اۋليەلەرىمىز بىزگە وسىنداي وسيەت قالدىرعان. وسى وڭىردە دە حاق جولىنا ايانباي قىزمەت ەتكەن, سول جولدا قۇربان بولعان قۋاناي حازىرەت سياقتى تۇلعالار بولعان. سوندىقتان ءبىز دە بابالار جولىنا بەرىك بولىپ, اللاعا يمانىمىز مىقتى بولىپ, قۇدايدىڭ بۇيرىعىنا بويۇسىنىپ, قايتارعان ىستەرىنەن تىيىلىپ, قولىمىزدان كەلگەنشە ادام بالاسىنا جاقسىلىق جاساۋ ارقىلى اللاعا يماندى بولايىق», دەدى باس ءمۇفتي.
ناۋرىزباي قاجى تاعان ۇلى بۇدان كەيىن كيەلى مەككەگە, قاسيەتتى قاعباعا مەملەكەت باسشىسىمەن بىرگە زيارات قىلعان ساپارىن ەسكە الدى.
«مەن ول كىسىمەن بىرگە مەككەگە بارعانىمدا, ەكەۋمىز ۇمرا جاساپ, قاعبانى تاۋاپ ەتىپ بولعان سوڭ, ارى قاراي سافا مەن مارۋاعا بارايىن دەپ تۇرعان ەدىك. پرەزيدەنت قاعباعا قاراي بۇرىلىپ, ء«اربىر قازاق باي بولسىن!» دەپ دۇعا قىلدى. ارينە, بايلىق دەگەن تەك دۇنيە ەمەس, رۋحاني بايلىق تا بار. بۇل تىلەكتە وتە ۇلكەن ماعىنا بار. قازاق ءۇشىن بالا-شاعانىڭ كوپتىگى دە بايلىق, دەنساۋلىقتىڭ ءوزى – زور بايلىق. مىنە, وسى بايلىقتىڭ بارلىعىن ءبىزدىڭ مەملەكەت باسشىسى اللادان حالقى ءۇشىن تىلەگەنىنە مەن كۋامىن, جانىندا تۇرىپ وسىنى ەستىدىم. اللا تاعالا ول كىسىنىڭ تىلەگىن قابىل ەتسىن», دەدى باس ءمۇفتي.
الماتىدا ەر ادام مەشىتتە ناماز ۋاقىتىندا ۇرلىق جاساعان
ناۋرىزباي قاجى تاعان ۇلى قازاقستان مۇسىلماندارى ءدىني باسقارماسىنىڭ اتىنان وسى مەشىتتى سالۋعا ۇلەس قوسقان وبلىس باسشىلارىنا, ورال قالاسى اكىمدىگىنە, كاسىپكەرلەر مەن بارشا قاراپايىم جاماعاتقا العىس ايتتى. جينالعان جۇرت جاڭا مەشىتتىڭ ءىشى-سىرتىن ارالاپ كوردى. ۇلكەندەر شاشۋ شاشىپ, بالالار تالاسا تەرىپ, ادەمى مەرەكە ۇلاسقان كۇن بولدى.
سەمەيدە مەشىت قۇرىلىسى باستالدى