قازاقستان مەن قىتاي اراسىنداعى ءاۆتوموبيلدى وتكىزۋ بەكەتتەرى 2026 جىلعى 16-18 اقپان ارالىعىندا جۇمىس ىستەمەيدى, دەپ حابارلايدى Egemen.kz قارجى مينيسترلىگى مەملەكەتتىك كىرىستەر كوميتەتىنە سىلتەمە جاساپ.
مەملەكەتتىك كىرىستەر كوميتەتى حابارلاعانداي, قىتاي ەلىنىڭ كوكتەم مەرەكەسىنە بايلانىستى 2026 جىلعى 16-18 اقپان ارالىعىندا قازاقستان-قىتاي شەكاراسىنداعى كولىك وتكىزۋ بەكەتتەرىندە كولىك قۇرالدارىنىڭ جانە جۇكتىڭ ءوتۋى جۇزەگە اسپايدى.
قازاقستان-قىتاي شەكاراسىنداعى تەمىرجول وتكىزۋ پۋنكتتەرى قالىپتى رەجيمدە جۇمىسىن جالعاستىرا بەرەدى.
«تاسىمالداۋشىلاردان جانە بارلىق شەكارانى كەسىپ وتۋگە نيەت بىلدىرۋشىلەردى ەنگىزىلگەن شەكتەۋلەردى ەسكەرە وتىرىپ, ءوز باعىتتارىن الدىن الا جوسپارلاۋدى سۇرايمىز», دەلىنگەن مەملەكەتتىك كىرىستەر كوميتەتىنىڭ حابارلاماسىندا.
بۇعان دەيىن حابارلانعانداي, قازاقستان مەن قىرعىزستان اراسىنداعى شەكارالىق وتكىزۋ پۋنكتى تاۋلىك بويى جۇمىس ىستەيتىن بولادى.