سەمەيدە ەرلەر مەن ايەلدەر اراسىندا توعىزقۇمالاقتان وبلىستىق بىرىنشىلىك ءوز مارىسىنە جەتتى. بۇل زياتكەرلىك ءارى ۇلتتىق سپورت تۇرىنەن ۇيىمداستىرىلعان جارىسقا سەمەي قالاسى جانە اياگوز, كوكپەكتى, جارما, بەسقاراعاي, اباي اۋداندارىنان كەلگەن سپورتشىلار قاتىستى, دەپ حابارلايدى Egemen.kz.
ءتورت كۇنگە سوزىلعان تارتىستى ويىنداردا قاتىسۋشىلاردىڭ ارقايسىسى ءوز شەبەرلىگىن كورسەتىپ, تاكتيكالىق ويلاۋدى ساراپقا سالدى. تۋرنيرگە بارلىعى 52 سپورتشى قاتىسىپ, جارىس 7 كەزەڭ بويىنشا ۇيىمداستىرىلدى.
وبلىستىق بىرىنشىلىك قورىتىندىسى بويىنشا ۇزدىك ويىنشىلار انىقتالىپ, ماراپاتتاۋ راسىمىندە اباي وبلىسى توعىزقۇمالاق فەدەراتسياسىنىڭ پرەزيدەنتى جارقىن ءجۇمادىلوۆ پەن اباي وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى باقىت بەكبوسىنوۆ جەڭىمپاز بەن جۇلدەگەرلەرگە مەدالدار مەن ديپلومدار تابىس ەتتى.
توعىزقۇمالاق فەدەراتسياسىنىڭ پرەزيدەنتى جارقىن ءجۇمادىلوۆ وبلىستا توعىزقۇمالاقتىڭ قارقىندى دامىپ كەلە جاتقانىن ايتا كەلە,سپورتشىلار مەن باپكەرلەرگە العىسىن جەتكىزدى.
«جۋىردا «ابايدىڭ زياتكەرلىك ىزىمەن» اتتى توعىزقۇمالاق ۇيىرمەسىنىڭ اشىلۋى –وڭىرىمىزدە ۇلتتىق ويىنداردى دامىتۋ باعىتىنداعى ماڭىزدى قادام. توعىزقۇمالاق –حالقىمىزدىڭ سان عاسىرلىق ءداستۇرلى زياتكەرلىك ويىنى, حاكىم ابايدىڭ دا سۇيىكتى ويىندارىنىڭ ءبىرى. سوندىقتان ونى وبلىستاكەڭىنەن دامىتىپ, جاستار اراسىندا ناسيحاتتاۋ زاڭدى ءارى ماڭىزدى قۇبىلىس دەپ سانايمىز.ويىنشىلارىمىز الداعى ۋاقىتتا حالىقارالىق جانە رەسپۋبليكالىق دەڭگەيدەگى بايقاۋلاردا ءوز شەبەرلىكتەرىن دالەلدەپ, جاقسى ناتيجەلەرگە قول جەتكىزەتىنىنە سەنەمىز. وسى باعىتتا جۇمىس ىستەپ جاتقان باپكەرلەرگە جانە قاتىسۋشىلارعا العىس بىلدىرەمىن», دەدى ج.ءجۇمادىلوۆ.
راسىندا, توعىزقۇمالاق – تەك ويىن ەمەس, ستراتەگيالىق ويلاۋ مەن زياتكەرلىكتى شىڭدايتىن جارىس. وسى رەتتە اتالعان تۋرنير وبلىس سپورتىنىڭ دامۋىنا سەرپىن بەرىپ, تالانتتى سپورتشىلاردىڭ رەسپۋبليكالىق جانە حالىقارالىق ارەنالارعا جول اشۋىنا مۇمكىندىك بەرەرى ءسوزسىز.