قازاقستاننىڭ ۇزدىك تەننيسشىلەرىنىڭ ءبىرى اننا دانيلينا Australian Open تۋرنيرىندە جارقىن جەڭىسكە جەتىپ, جۇپتىق سىندا جارتىلاي فينالعا جولداما الدى. بۇل جەتىستىك قازاقستان تەننيس تاريحىنداعى ماڭىزدى بەلەستەردىڭ ءبىرى سانالادى, دەپ حابارلايدى Egemen.kz.
ايەلدەر اراسىنداعى قازاقستاننىڭ ۇزدىك تەننيسشىلەرىنىڭ ءبىرى اننا دانيلينا سەربيالىق الەكساندرا كرۋنيچپەن بىرگە ءتۋرنيردىڭ ءبىرىنشى ءنومىرلى جۇبىنا قارسى كورتقا شىقتى. ولاردىڭ قارسىلاستارى – جۇپتىق سىنداعى الەمنىڭ ءبىرىنشى جانە ەكىنشى راكەتكالارى, چەحيالىق كاتەرينا سينياكوۆا مەن امەريكالىق تەيلور تاۋسەند بولدى. تارتىستى وتكەن كەزدەسۋ 6:3, 3:6, 6:0 ەسەبىمەن دانيلينا مەن كرۋنيچتىڭ پايداسىنا اياقتالدى.
اتالعان جۇپ ەندى فينال جولداماسى ءۇشىن كانادالىق گابريەلا دابروۆسكي مەن برازيليالىق لۋيزا ستەفاني دۋەتىمەن كەزدەسەدى. ايتا كەتەيىك, اننا دانيلينا بۇعان دەيىن, 2022 جىلى, Australian Open ءتۋرنيرىنىڭ جۇپتىق فينالىنا دەيىن جەتكەن ەدى.
Australian Open-2026: اننا دانيلينا شيرەك فينالعا جولداما الدى
جاس تەننيسشى دە قۋانتتى
Australian Open ءتۋرنيرىنىڭ جاسوسپىرىمدەر ساناتىندا تاعى ءبىر قازاقستان تەننيسشىسىنىڭ جولى ءساتتى جالعاسىپ جاتىر. 17 جاستاعى زاڭعار نۇرلان ۇلى ءتۋرنيردىڭ شيرەك فينالىنا شىقتى. ول 1/8 فينالدا رەسەيلىك ساۆۆا رىبكيندى 6:1, 6:4 ەسەبىمەن سەنىمدى تۇردە جەڭدى. ەندى جارتىلاي فينال جولداماسى ءۇشىن گونكونگ وكىلى كاي تومپسونمەن كۇش سىناسادى.
بىلتىر زاڭعار نۇرلان ۇلى جاسوسپىرىمدەر اراسىنداعى US Open تۋرنيرىندە جارتىلاي فينالعا دەيىن جەتىپ, كوپشىلىكتى تاڭعالدىرعان. ەندى ول تاعى ءبىر «ۇلكەن دۋلىعا» جارىسىندا جوعارى ناتيجە كورسەتپەك.
17 جاستاعى قازاق تەننيسشىسى الەمدىك رەيتينگتە جوعارىلادى
ايتا كەتەيىك, بۇگىن قازاقستاننىڭ تاعى ءبىر جۇلدىزى, الەمنىڭ بەسىنشى راكەتكاسى ەلەنا رىباكينا Australian Open ءتۋرنيرىنىڭ شيرەك فينالىندا پولشانىڭ ايگىلى تەننيسشىسى, «رولان گارروس», ۋيمبلدون جانە US Open چەمپيونى يگا شۆەنتەكتى سەنساتسيالىق تۇردە جارىس جولىنان شىعاردى. بۇل جەتىستىكتەر وتاندىق تەننيستىڭ الەمدىك ارەناداعى بەدەلى ارتىپ كەلە جاتقانىن ايقىن كورسەتەدى.
Australian Open: ەلەنا رىباكينا الەمنىڭ ەكىنشى ۇزدىك راكەتكاسىن جەڭدى