بوكستان ەكى دۇركىن الەم چەمپيونى, لوندون وليمپياداسىنىڭ چەمپيونى سەرىك ساپيەۆ ءوزىنىڭ ورىنباسارى داۋرەن ەسىمحانوۆپەن جانجالداسىپ قالدى, دەپ جازادى Egemen.kz.
قاراعاندى وبلىستىق سپورت باسقارماسىنىڭ باسشىسى سەرىك ساپيەۆ ءوزىنىڭ ارىپتەسىمەن كەلەڭسىز جاعدايعا تاپ بولدى. وقيعا 21 قاڭتار كۇنى قاراعاندى قالاسىنداعى بۇقار جىراۋ داڭعىلىندا بولعان.
بەيرەسمي دەرەكتەرگە سايكەس, ساپيەۆتىڭ ورىنباسارى باسشىنىڭ رۇقساتىنسىز قۇجاتتارعا قول قويعان.
ءسويتىپ باسشى مەن ورىنباساردىڭ ورتاسىنان وت شىققان. ساپيەۆ دەنە جاراقاتىن الىپ, كوستيۋمى مەن كويلەگى جىرتىلعان.
جاعدايعا بايلانىستى وبلىستىق پوليتسيا دەپارتامەنتى مالىمدەمە جاسادى.
«قاراعاندى قالاسىنىڭ 42 جاستاعى تۇرعىنىنىڭ ارىزى نەگىزىندە ۇرىپ-سوعۋ دەرەگى بويىنشا قىلمىستىق ءىس قوزعالدى. انىقتالعانداي, 21 قاڭتار كۇنى قالاداعى سپورت كەشەندەرىنىڭ ءبىرىنىڭ عيماراتىندا ەكى ەر ادام اراسىندا جانجال شىققان. قازىرگى ۋاقىتتا پوليتسيا قىزمەتكەرلەرى وقيعانىڭ بارلىق ءمان-جايىن انىقتاپ جاتىر», دەلىنگەن حابارلامادا.